牛扒快餐

July13, 2017, Thursday

平時Cindy放假, 晚上我地大都出去食晚飯, 但呢幾個星期四, 放工回家我都回家自己煮, 最主要係為二公子.  佢呢排training 好辛苦, 早出晚歸, 返到嚟有時八點幾九點, 咁夜唔出去食啦.   咁我放工比佢早, 返到去煮好, 佢返到嚟咪即刻有的食.

在家裡整快餐, 最好就係煎牛扒.

 

上星期整咗個南瓜忌廉湯, 實在太好味, 今日再煮.   今次先加大半礶水煮開的南瓜蓉, 最後先加三份一礶cream.

 

上次嫌唔夠配菜, 今日有即食白露筍

加的荷蘭醬就得.

另外再炒的秋葵及洋蔥

等到八點幾, 二公子都未返, 咁我同型爸食先.  用牛油起鑊

呢塊扒好薄身, 我唔用鑄鐵pan, 用普通易潔鑊得啦.

啱啱煎好, 聽到二公子車返, 馬上煎埋佢嗰塊, 可以一齊食.

二公子嗰日做兄弟, 佢朋友送咗兩枝金鉑汽酒, 咁順便開嚟試吓啦.

哈哈, 好似好美滿咁....

一切塊牛扒......韌都無命....放每一塊入口, 都要"趙"好耐....  超差勁呀!  
 最開心係兩隻野啦, 咁韌食到牙都攰, 益兩隻寶貝啦.

認著呢個標誌, 我响一田買的, 真係估唔到係咁.  我以後一定唔會買, 同我上星期食的日本雪花肥牛, 完全無得比呀!

 
至於呢的酒, 型爸飲咗幾啖, 佢話唔得, 唔飲啦.  二公子又係飲幾啖唔飲.     我飲落又唔係覺得好難飲, 飲咗幾啖似Apple Cider, 但型爸話唔好飲, 我都唔飲, 倒咗去.

真係好彩唔飲咋, 我飲咗幾啖, 全塊面紅哂頭暈暈, 都唔知咩酒嚟嘅, 即上頭.

今晚最好飲係個湯, 食埋的配菜加埋半塊超韌牛扒, 都可以啦.