富東酒家百日宴

Jun 25, 2017, Sunday

天氣實在好熱, 行完山食完晏返到屋企都已經兩點幾.   出得汗多, 整個人都好攰.   馬上梳洗休息, 晚上仲要去飲宴呀!

今晚嘅飲宴係型爸朋友的兒子百日宴, 要去港島銅鑼灣, 仲要去沙田接埋型爸兩位朋友


飲宴地點, 富東海鮮酒家

主人家同呢道嘅大廚林永春先生好熟, 林生也有來飲宴.

今晚的菜單, 數一數, 都有十二三圍

姬松茸响螺湯...個湯清甜好味.  湯渣都一大碟

鮑魚鴨掌....隻鮑魚真係整得好好味, 比個大手拍公佢! 好似年糕咁依依韌韌, Yummy!! 

黃金鴛鴦蝦球, 的蝦好爽口.  

呢個炸蟹拑麻麻, 外皮有的韌呀!

西芹花椒象拔蚌, 一般啦.

呢條東星班勁大條, 仲長過呢隻20寸大碟.  不過養魚就味淡的啦.

杞子魚湯浸時菜, 幾好味.

炸子鮮雞...外皮炸得幾脆, 食落分唔出係鮮雞

荷葉飯我佔食, 型爸話麻麻地.

 
甜品竟然有四款, 紅豆沙, 桂花糕

 
壽包

最後呢樣我最喜歡....睇落完全唔知係咩野糯米茲

食落原來入面係鮮芒果....好好味呀!  正

今晚我的喜愛....嚮螺湯, 鮑魚. 仲有芒果糯米茲.

飲完我有重大任務, 就係做司機.   佢地個個飲咗好多酒, 我負責送佢地返屋企....九龍塘, 沙田大圍, 科學園, 粉錦公路.....  好彩有人肉GPS型爸坐隔離, 唔係我邊識路呀!