港味 V. Taste

Jun 29, 2017, Thursday

睇免費報紙, 見到盞記的螺片做特價,  咁今晚出行食飯, 順便去上水中心食飯兼買野.

買完螺片, 就諗著去茶木食飯, 點知排長龍, 唔等啦.  見到呢間港味, 裝修好新淨, 就行去睇吓啦.

 咦, 有燒味檔, 即係廣東食肆.  即時有位, 咁就入去試吓啦.

入門口見到呢張檯, 幾攪鬼呀!

 睇餐牌, 價錢都算經濟, 某些餸菜, 星期一至四仲有優惠....哈哈, 啱哂, 今日星期四

除咗小菜, 仲有點心

點咗三款野, 後來又加咗一客花腸嚮螺湯

 到侍應問我地要咩野茶, 我地先知要比茶錢.  佢地只供應茶包, 每位hk$6

 我地要了焗魚腸, 焗出嚟好乾, 只係似焗蛋, 入面加了兩三條魚腸,

 最唔 Like係蛋嘅底層全部都係黑灰色唔知係咩

 

要了五穀炒飯, 但嚟到只係炒飯加咗的南瓜子仁....同餐牌張相相差好遠.   完全係貨不對辦.  侍應話可以退咗佢, 不過型爸話算啦.

 水煮龍躉頭腩.  港式煮法, 少少辣, 呢個我又喜歡喎, 無川式咁多酒及辣椒

 呢個花膠螺頭湯本來幾好嘅, 點知送到嚟的湯唔熱嘅, 只係暖暖地, 失哂真.

 今餐要了兩餸一飯一湯

 埋單原來仲要加一.   價錢唔貴, 但型爸話唔抵食.  下次食小菜, 都係要去知味小廚.