大公子返嚟嗰日, 我地去咗秋田食鐵板燒, 埋單時, 送咗3張一佰蚊coupon, 可以用嚟食日式火鍋, coupon有三個月期限.
Friday night, 唔想返屋企食飯, 諗著出去食, 問大公子二公子去唔去, 大公子話要打波, 二公子好似無咩興趣. 咁好吖, 我可以同型爸撐權腳. 都唔知去食咩好嘅時候, 突然醒起....
有呢三張coupon喎, 我地兩個食, 咁咪好正.
點知當佢地知道我地去秋田食日本菜, 大公子話又想去, 問我早的食得唔得.... 好, 咁六點半食啦, 佢食一個鐘先去打波. 大公子去, 二公子又去.
佢兩個一早出嚟搵型爸去飲野, 約咗我六點半喺秋田等. 點知飲野時型爸又撞到幾位朋友, 結果仲約埋一齊食晚飯. 因大公子趕著時間食六點半, 我地先食, 型爸的朋友七點半先嚟. 哈哈, 本來二人撐檯腳, 結果十個人食晚飯.
今日訂咗2/F, 食shabu shabu
我地要咗呢個corner, 可坐十一個人. 呢道係每人一爐食火鍋
呢個食shabu shabu同sahimi嘅menu
火鍋套餐有三個選擇, 咁當然可以散叫唔要套餐. 不過我地要快的叫, 大公子得一個鐘. 揀咗一個海鮮二人套餐, 加一個牛肉二人套餐, 大家share嚟食.
另外叫咗一個"竹" shashimi combo
叫咗野等食期間, 問佢地有咩野送比我地食, waitress攞咗兩碟前菜, 入面有喬頭, 淮山同蘿蔔.
原來呢的日本人叫嘅淮山, 即係我地嘅牛蒡.
每人一份嘅食具, 仲有唔同嘅豉油醬汁
跟著就比的野我地玩啦
一隻小碗, 入面有芝麻, 加一條小木捧
用嚟將的芝麻磨碎
磨碎嘅芝麻就加落呢碟麻將
嘻嘻! 都幾好玩
佢地攞個一人鍋嚟啦, 已經有三隻蜆喺入面. 第一樣係清酒火焰煮大蜆
每人一碟什菇蔬菜豆腐
個一人鍋放喺counter預設個圓孔上面, 而下面係電磁燼嘅開關
呢, 就係咁啦.
呢個係清酒火焰煮蜆, 清酒已經預先放咗喺個鍋入面, 嚟到就用打火器點著的火, 呢張相的火已經點著, 中間黃色嗰的係火光, 鍋邊藍色係火焰.
的蜆都幾好味
的魚生嚟啦. 型爸應承大公子同佢食的好的嘅魚生, 今天做咗佢嘅承諾. 呢個"竹"combo shashimi唔錯, 有生牛肉, 鯖魚, 鱲魚, 牡丹蝦, 赤貝同海膽. 好正呀!
火鍋湯底有幾個選擇, 大公子揀咗sukiyaki, 二公子揀咗日式咖哩, 而我同型爸就揀咗鱲魚湯底
淬底嚟到, 先將的什菇蔬菜放入去煮
火鍋牛肉配料嚟啦! 嘩! 二人套餐, 每樣都係得四片, 有松板牛肩胛肉, 松板神牛頸肉, 松板牛胸肉, 同鹿兒島牛舌. 我地四個人share 嚟食, 每人每樣都係得一片
呢個係佢地自家製嘅免治雞肉軟骨&鱈魚肉捧(配牛肉餐). 仲有自家製手打墨魚肉拼淤蝦捧. 我地四個人, 每人又係分少少
呢個係海鮮拼盤, 有廣島蠔, 龍蝦及一條"雞魚"(我聽嗰位侍應係咁, 但唔知係咪用呢個"雞"字, 又或者日文會有唔同.
的魚肉海鮮差唔多食哂, waitress 幫我地攞條魚骨去斬件, 又可以焯嚟食, 非常鮮甜
呢個時候型爸的朋友到啦, 佢地忙於點野食, 我地就繼續啦....
最後可以選擇食烏冬或粥(白飯), 我揀咗烏冬...好味
型爸揀咗粥, 佢地將碗白飯加咗落的鱲魚湯到..嘩! 煲起真係超好味.
我都攞咗的嚟食, 好好味呀..
型爸嘅朋友叫嘅都同我地一樣, 一係叫海鮮, 一係叫牛肉... 另外再加咗三隻南非鮑魚, 大家焯嚟食.
咁多人, 當然唔少得飲酒啦, 一開始, 開咗一支1.8liter, 太平山天巧純米大吟釀
唔夠再開多一枝1.8liter
飲完兩支1.8liter, 都好似唔係好夠, 結果再開多一支720....
但係飲哂都仲係好似唔夠, 不過真係唔可以再開啦, 見到幾位男士都開始有的醉意.
最後, 呢杯雪糕結束今晚嘅晚餐. 有朱古力味, 綠茶同黑芝麻. 我同型爸都揀了黑芝麻.
飲咗咁多酒梗係唔開車啦...call taxi返屋企....
回想呢餐, 食肉真係唔多, 的食物真係貴精不貴多, 但我地都食到好飽喎. 比起平時去食中式火鍋, 一開始會食大量肉類(肥牛...各式丸類), 最後先食菜. 呢個日式火鍋都算健康.
沒有留言:
張貼留言