又嚟墨西哥鮮奶包

May 2, 2012 10:46 PMPublicPageviews 191 1

April 28, 2012, Saturday Night, 佛誕假期

型爸落order, 又想食墨西哥鮮奶包, 所以今日又整呀!

整蒜泥白肉時, 先落的粉去麵包機, 跟著又焗燒肉. 攪掂入爐, 的麵團就已經差唔多, 我要分割做型啦.   (唉, 又攪到自己好忙, 但唔想留番今晚咁夜先至整呀!) 

兩個大麵團, 分割咗30個小麵團, 每個大約50-52g, 搓圓放入紙杯, 再蓋布發酵.


跟著就整埋個包面料

但係整好之後, 的燒肉已經焗好, 七點半, 我要過去啦.... 唔夠時間整, 咁點好呢... 我問Ruby想唔想試吓唧的面料落的包到, 點知佢幾高興(可能等咗想玩好耐), 太太, 妳去食飯啦, 我識啦, 上次見到我整, 佢話佢得喎.   其實我都無咩選擇, 如果唔係, 我要遲多半個鐘, 咁Potluck就唔係咁好啦, 唔通要個個等我一個咩, 咁就交比佢啦.

不過食完返到嚟, 我就好失望囉.....焗就焗好, 但係的包好醜樣呀! 

 

唉, 真係有的唔開心, 但係又唔出得聲, 鬼叫自己唔夠時間整咩, 唔知係咪佢無聽我講, 最後幾要將盤麵包放高的焗幾分鐘, 覺得個面唔夠脆呀!   亦都可能因為咁, 個包面焗起唔夠圓囉.

還好, 味道都係ok嘅.   呢30個包, 第二日就已經無咗15個...比咗幾個三號屋同八號屋, 呢幾次整包佢地都未試過. 又攞咗兩個比媽媽食.  好快就會消滅哂.

又要諗吓下次整咩野包好先.    啱啱買咗全麥粉同粿麥粉.....