唔燒烤的BBQ night

2012年8月13日下午2:50公開累積瀏覽 285 1

August 11, 2012, Saturday

去影樓揀相揀我好開心呀!  有好多張都影得好靚, Loki好上鏡, 差唔多張張都有佢.  我地揀吓揀吓, 揀咗50張呀!

睇完的相辦, 心情都靚的呀! 不過要等好耐, 先有相攞呀!  二公子無一齊嚟揀, 佢去咗街, 咁我地就幫佢揸主意揀相啦.

本來今日諗著再同大公子去按摩, 點知揀相揀得太耐, 唔係好夠時間, 無得去lu, 大公子要等下次返嚟先可以去呀!

跟著我地去咗大埔超級城, 我地都未去過, 周圍行吓啦.


大公子好鍾意食雪糕, 去到就每人一個單球先.  一齊食雪糕, 好開心

 

去到一田超市, 見到和牛漢堡同黑豚肉漢堡大減價呀!   即刻入貨.

仲有和牛.  前一排百佳/Taste, 唔知一日定兩日就賣哂,  今日响呢道買啦.  大公子走前卒之可以食到啦.

買緊和牛, 林老闆打電話比型爸, 叫我地join佢地晚上嘅BBQ, 吓, 佢地今日已經開兩場, 仲要加多我地一埸.   嘻嘻, 佢梗係好掛著型爸, 搵佢陪佢飲酒.  咁好啦, 我地本來諗著同大公子食玻璃腸粉, 咁唔去啦.   天氣咁熱, 其實我地唔係咁想燒野食, 好熱呀!


結果我地買咗一盤壽司


兩條池魚魚生返去一齊食.

結果去到, 我地都係食壽司為主, 我同型爸都無出去燒野食, 食呢的同生果就算啦.   後尾叫大公子出去燒咗兩條腸同魚蛋, 佢地又燒塊牛排比我地, 夠哂啦.  嘻嘻, 我地都係鍾意嘆冷氣.


不過呢個咀叨嘅型爸, 食完的魚生, 佢話最好就將的魚頭魚骨炸咗佢, 用嚟送酒就好正.  佢咁講, 我唯有攞返屋企炸咗佢....攪到我身水身汗, 不過佢地真係連骨都食埋, 呢條魚, 真係抵食啦, 骨都無得剩呀!

九點幾, Mr & Mrs Kua佢地食完晚飯設嚟, 帶咗支好好味嘅冰酒, 飲完林老闆又開一支, 結果我飲咗好多呀!   但我今日狀態好, 飲完都唔覺好大酒意, 唔知係咪心情好呢!

今日十一點幾成十二點先散band, 唔緊要喎, Saturday night, 明天唔使返工....開心呀!