又嚟開心聚餐

2012年8月23日下午12:48公開累積瀏覽 241 2

August 19, 2012,

今日我地條村嘅工人姐姐全部放假, 平時大多數都係放week day.  佢地喜歡約埋一齊出去玩, 話week day無咁多人, 玩得開心的.  但今日係佢地新年, 出去時化哂濃化妝, 著哂長裙, 直程係另一個人, 哈, Ruby就變咗另一個人.  希望佢地今日全部玩得開心的啦.

我地呢條村嘅太太, 雖然無工人姐姐, 都無偷懶呀!  為咗今晚嘅potluck, 個個都親力親為, 整番兩味.

先睇吓五號屋先啦....

五號屋皮蛋酸薑, 自己醃嘅酸薑, 再切的皮蛋, 配埋一齊, 超好味.  開胃前菜


五號屋煎腐皮卷, 不過唔係自己包, 買餸時豆腐檔姐姐叫我買嚟試吓, 咁咪試吓囉.  梗係無自己包嗰的咁好食啦, 因為的腐皮都無用的調味豉油搽過.


五號屋"焗親" 嘅節瓜烙....做咩鬼放入焗爐keep warm呢.


五號屋美極焗雞.

主人家八號部屋嘅南乳炸掛骨

八號部屋超大碟嘅豉油皇炒麵

十三號部屋嘅洋蔥牛柳

十三號部屋嘅土魷炆南瓜

三號部屋嘅虫草花炒白瓜 (入面有鮮蝦同肉絲)

三號部屋嘅焗黃立倉.  嘩, 條魚勁大條勁好味呀!   用唐芹芫茜墊底再加的入魚肚內.  魚面放上檸檬, 加錫紙蓋面嚟焗. 今次係用焗唔係蒸,條魚焗起仲係好滑, 等我下次都試吓先.


整吓整吓都有九碟, 再加埋嗰碟勁大碟嘅肉絲炒麵就有十碟.

餐後甜品一樣咁豐富

十三號部屋買回來嘅西米布丁


三號部屋買回來嘅蘋果批

五號屋又預備了一大盒西瓜

真係食到個個都捧著個肚.

主人家開咗一支紅酒. 飲完紅酒就飲Port.  林老闆又攞咗另一支Glenfiddich 19 years.

不過我唔知做咩野, 狀態不佳. 飲咗少少紅酒都已經頂唔著.  坐近冷氣位, 吹到我頂唔著, 好似有的發酒寒, 即刻唔敢飲啦.

食完攞的碟返屋企洗, Ruby已經返咗嚟.  佢都唔知我煮過飯, 因為我煮完抹到個廚房好乾淨.  到我拎返四隻碟返去, 佢先知我地potluck,  留咗兩嚿雞, 幾件腐皮卷同一塊節瓜烙比Ruby, 佢好開心喎.

我問Ruby今日好唔好玩, 佢話太多人啦, 又熱又攰, 佢話頭都痛埋, 佢唔鍾意.  平時放假好的, 唔使咁多人.