稻香超級漁港 - 上水

2012年8月5日下午2:56公開累積瀏覽 261 1

August 3, 2012, Thursday

呢兩日天氣悶熱, 兩個颱風一齊出現夾擊台灣, 希望唔好有太多傷亡啦.

香港熱到溶唒, 但係型爸同二公子都話想去打邊爐.   哈, 香港人真係鍾意打邊爐, 連電視劇回到三國裡嘅司馬雲信都要介紹劉關張佢地一齊打邊爐.

放咗工先返屋企, 等Ruby返到嚟我地先出去食.   大公子去咗打波, 如果唔係, 佢都鍾意打邊爐.

型爸話上次經過上水一間小鋪, 見到有好多人排隊等位食火鍋, 咁我地開車出去睇吓啦, 點知去到兜咗兩個圈都見唔到, 反而見到有間稻香漁港, 又近停車場, 咁就去呢間啦.

嘩! 真係唔信, 星期四晚, 竟然要等位... 不過都好快, 都係等咗十分鐘.

坐低睇吓, HK$1蚊豬骨鍋, 好抵...唔使諗啦, 檯檯都係呢個湯底.

自助吧每位HK$8包飲品甜品, 又係唔使諗都要啦. 跟著就每樣點的啦.


就係呢個自助吧

各款醬料調味自己攞

各款汽水仲有竹蔗水, 豆漿同酸梅湯

甜品有清保涼, 紅豆湯, 芝麻糊同杏仁茶.


豬骨鍋底嚟啦.

但係的火鍋配料, 等咗好耐都未嚟呀!


結果第一樣嚟嘅係三色生麵, 未影相就比二公子掉哂落個鍋...佢好肚餓呀!

其實我地三個都好肚餓, 用的自調嘅醬汁, 撈三色麵嚟食.  都幾好味喎....唔知係咪太肚餓.


的配料卒之嚟啦,  四寶丸, 鵝腸, 冬蔭公魚片頭

坑腩片, 響鈴, 蕃薯葉....

等呀等, 點解碟水餃同兩碟肥牛仲未嚟嘅, 叫咗兩三位侍應幫忙催吓, 佢地都係咁意話等等啦, 好快嚟架啦.... 點知等極都係無.

最後再搵一位小姐幫我地check單, 先知水餃無落喃單, 咁唔要啦.   但係牛肉有落單, 咁唯有等啦.


卒之嚟啦, 呢兩碟姍姍來遲嘅牛肉真係犀利, 每碟都只係有6片, 我夾起一嚿焯嚟食....呢的牛肉當然係無咩牛味啦.

我都差唔多夠啦, 唔食啦, 讓佢兩仔爺食, 我去食甜品.

攞咗一碗杏仁茶, 一碗芝麻糊, 每樣先試一啖....嘩, 好味喎... 每樣再食多兩啖

跟著就二合為一, 成為呢碗兩溝嘅芝麻糊杏仁茶....好味呀!

食完真係超飽


埋單HK$367.   係咪算抵呢....但係我地唔係叫咗好多野食喎.

返到屋企...Ruby响道大叫.....Loki好曳呀! 見我地出去食飯, 佢又發脾氣呀! 佢靜雞雞跑上樓上, 跳上你地張床, 不斷叫不斷跳, 整亂哂的被, 直至上去鬧佢先跳番落嚟.

我地聽到咁, 型爸即刻拉著Loki條頸帶拉佢上去, Loki知衰啦, 無論型爸點拉, 佢死都唔肯上去.   咁我鬧咗佢幾句, 跟萫我地唔理佢先上房, 知道佢一陣間就會自己走上嚟.   大約過咗半個小時, Loki忍唔著走上嚟,  我就指著張床(仍未收拾好), 再攞著佢响我床頭櫃咬咗嚟玩裝著椰子油嘅樽嚟鬧佢.   佢梗係頭茸茸好唔開心咁啦, 跟著坐喺門口唔睬我同型爸, 我同型爸都夾埋唔理佢.  佢死死地氣响道瞓覺.

到第二朝Ruby日早上嚟我地房間, 又對著我地再講一次, Loki豎起耳仔响都聽, 聽完又擰開塊面.  見到佢咁樣, 真係唔知好嬲定好笑. 

我地下次出門都真係要關實房門, 間房都無著燈, Loki黑麻麻都要跳上去, 仲要大叫大跳直至Ruby上去為止(佢好似驚我地唔知佢跳過上去搗亂咁), 佢係要比我地知佢唔開心, 點解唔帶佢出去....唉, 都唔知點解呢隻狗咁鍾意發脾氣嘅.