女子組韓國遊 - Day 5

November 18, 2013, Monday

玩咗四天, 今日要離開啦...

姪女同嫂嫂零晨四點幾回到酒店, 我都要起床梳洗.  我昨晚敷吓面膜, 執吓行理都攪到兩點幾先瞓, 只瞓得兩個鐘幾鐘, 仲瞓得唔好, 同佢地通頂都係無咩分別.

梳洗完畢後, 攞埋行理便出發坐巴士到機場...呢個時候都只係零晨五點半.   佢地博殺咗一晚, 卒之可以响巴士上休息一吓.

去到機場check in 之後, 又要去打印退稅, 攪呢攪路都攪咗一個鍾.

攪掂完, check哂的行理入去機埸duty free, 哈哈, 各自分頭行事繼續買, 約响閘口等.

我買完兩枝Whisky就入去club lounge食的野.  今日覺得唔凍啦, 見到雪糕, 試吓先.

芝士味, 未試過喎.

不過食落係一的芝士味都無.

　
　

食番碗辣泡麵

加杯Cappucino, 夠哂.  一陣又食飛機餐

飛機準時十點二分起飛

十一點幾就serve lunch

選了韓式牛肉炒飯, 幾好味, 但鹹咗的.  飛機餐係咁上下啦.

準時到港, 型爸嚟接我...

睇吓我地走時共有幾多件行理....

去程時每人一個大喼. 回程時四人共四個大喼, 四個細喼, 仲有四袋...

哈哈哈哈, 今次淨係我一個人都已經消費了成百萬(仲未計機票), 我肯定姪女同嫂嫂各自都消費得比我更多, 促進韓國繁榮添.....kakakaka, 巴之敝...韓幣嚟之麻.

去韓國好多次, 以前都係一家人去, 滑雪旅遊, 都係跟旅行團.  今次自遊行都係另一種體驗.   全程未坐過的士, 全部都係坐公共交通公具.

住嘅係平民地方, 如果唔係姪女代訂, 自己跟本唔識搵呢的地方.

最聰明係唔預型爸一齊嚟, 男士都一定唔鍾意咁樣行街, 四個女士, 行去邊都得.  今次亦都係第一次同姪女, 嫂嫂一齊去旅行.  嫂嫂剛從加拿大回來, 呢個trip都算係為佢而設架.

今次真係多謝大姪女, 安排哂一切, 我地只係買機票就得啦.

食, 住, 交通都非常經濟, 留番的錢都係買買買.....開心!