馬家莊清真館

October 30, 2013, Wednesday

今日我同另一位同事食晏, 兩個人都唔知食咩好, 同事話不同去H8啦, 咁多間食肆, 到時去到邊間就食邊間啦.

心中盤算, 應該都係去James Kitchen, 上次食過明太子冷烏冬幾好味.

但去到按電梯時, 咦, 8樓又開咗一間新餐廳, 去試吓都好喎.  (之前8/F係BaliLili, 後來轉手變了潮源雞煲私房菜, 好短時間又關了門, 樓上食肆真的不易做)


電梯門打開, 即見到馬家莊清真館, 同事話九龍城應該都有一間, 但我比較少去九龍城, 未去過.


入到去先留意到, 清真館只有有牛羊雞, 但無豬肉.  我的同事不吃牛, 但羊或雞都無問題.

有款午市商務套餐十分抵食, HK$155兩位, 有呢道出名的牛肉餡餅, 還可以選兩款小菜.  可惜同事唔食牛, 問咗侍應又話套餐唔可以轉雞肉餡餅, 咁今次唔叫呢個餐啦, 下次搵個鍾意食牛嘅同事先叫啦.   況且其他優惠午餐都好抵食.

 優惠午餐每人送豆漿一杯

 

叫了咖哩羊腩飯HK$48,  的飯未送嚟時, 耳畔聽到有幾位男士都叫咖哩羊腩飯.  一送到埋檯, 好香呀. 

 

食落好正呀, 羊腩只有幾件, 但腍度啱啱好, 的汁用嚟撈飯, 真係好好味.  我與同事都是無飯癮之人, 但的咖哩汁真係好好味, 全碟飯我地食哂.

另外叫了一碟素什錦炒陽春麵, HK$40.   呢碟無咖哩羊腩咁濃味, 但炒得幾好, 唔覺得油膩.

兩個人只叫了兩款食物, 但已十分足夠.

 

埋單HK$88, 午市唔使加一, 抵食呢.

走時等電梯, 見到牆上貼了好幾篇介紹馬家莊清真館的介紹

其中一張有蔡瀾簽名呢!

電梯到時, 有另一位女士一同入電梯, 我見她在這裡買了外賣, 便多口傾兩句. 佢話以前成日去開九龍城買嚟食, 而家尖沙咀開了分店, 嚟呢道方便的.

 

馬家莊清真館九龍城, 太子, 深水埗都有店, 現在在H8八樓開了分店, 食晏又多一個選擇啦.