空運到港 - 猫山王

August 20 , 2014, Tuesday Night

今日真係比個胃折磨到不得了, 早餐一塊多士加一杯麥皮, 分了三次食(食了三個鐘).  午餐一碗米線又要分兩次食.  今日只係第七天....仲有七天要捱呀!

咩野攪到我咁辛苦...

 
咪呢的消炎藥同胃藥.   加加埋埋一日要食二十粒, 一款一日兩次每次兩粒, 一次一粒, 四次兩粒, 三次兩粒......我見到己經打冷陣...!   但又唔敢唔食, 如果今次唔捱十四日, 殺唔死的菌, 下次仲要食長的時間就真係攞命.    好多人都係食一次藥就攪掂, 但我要食到第三次.  第一次要我食七日藥, 唔得, 第二次要食十日藥, 不過都仲係唔得, 今次第三次, 如果仲殺唔死的幽門螺旋菌, 我係咪要與佢共全呢? 

 

 晚餐只叫Ruby煮了雞肉菜心掛麵, 只想飲的熱湯, 最好有的胡椒响入面, 暖吓個胃.

今天真係覺得好慘淡, 平時呢樣又怕肥, 嗰樣又怕膩, 但如今見到的野唔想食, 食落個胃又頂著, 真係咩趣都無呀!

但今個晚上有鄰居雪中送炭呀! 佢邀請我去食剛空運到港嘅猫山王呀!   我個心都十五十六, 唔知個胃頂唔頂得著.   但鄰居話榴槤對個胃好架, 咁就去食的試吓啦.

 

去到見到, 嘩, 做咩今次個盒咁pro嘅, 膠盒包裝 , 個盒都幾大個架.

 打開入面全部真空獨立包裝

 每包應該係一瓣榴槤肉

 撕開包裝就可以食.   因為真空包裝關係, 的榴槤肉壓扁咗, 猫山王的果肉比較腍, 對於我地鐘意食榴槤嘅人, 梗係好好味啦!
 

包裝後面, 寫著馬來西亞榴槤, 水果之王.  介紹的榴槤樹, 開花之後先結果, 有些樹已超過百年, 越年老嘅樹結嘅果就越甜呀!

 呢的包裝可以放入冰格, 食前先放冷藏解凍.   我以前去多倫多姊姊屋企, 佢地買番嚟嘅榴槤, 都係冰凍架.

 一小包, 但食出嚟有三個核, 咁即係一瓣肉啦.

再睇真的包裝紙, 馬拉出品, 但星加坡包裝.

食完一包, 個胃唔反對, 就再食多一包.  咦! 個胃都無反對喎.  當晚食完, 仲拿了兩包, 如果真係好的話, 明晚可以再食!

當晚都唔覺, 到第二天就覺得有的不一樣. 個胃真係無咁辛苦, 無咁嗱著嗱著.  雖然都仲係有的唔舒服, 的胃氣不斷谷上嚟, 但可以出去食晏都好開心啦.

真係要多謝鄰居的關顧, 食到咁美味的猫山王.

對於過份包裝唔係好認同, 但今次對呢的獨立真空包裝非常認同.   榴槤嘅味道好大, 喜歡的人鐘意到不得了, 不喜歡的人就怕怕.   真空包裝可以將味道減到最低, 再放入盒再放入雪櫃味道唔會咁大, 無咁大影響.   仲可以放入冰箱急凍, 食幾多, 攞幾多件.

平時買榴槤, 只會挑選最細個, 因為家裡只得我食.  如果用抽真空獨立包裝再放入冰箱呢個方法, 咁我可以買一個大的, 分開包裝, 慢慢食都得啦.

屋企有個真空機, 唔用就嘥啦, 哈哈, 諗起都開心呀!