海龍海星蟲草花竹絲雞湯

April 2, 2016, Saturday

下午同媽媽哥哥食完飯, 跟著去買餸.   哥哥叫我拎另一份燒肉雞返屋食, 好吖, 我無問題呀! 今晚又諗少兩樣餸

在超市買咗湯包, 即刻煲嚟飲.  呢款湯包唔平呀, 原價成一百文一包, 現買三包二百一十文, 大約七十文一包.

材料有海龍海星魚翅螺片

仲有蟲草花, 雪梨, 地參, 蜜棗蓮子圓肉.........

買隻烏雞, 為免多油, 去皮

再加湯骨.....

海龍海星魚翅螺片烏雞湯骨汆水, 跟著全部材料放入萬能煲....撳製...攪掂!

的烏雞已經去皮, 不過都仲係有的油.....嘩!   呢煲湯好清甜呀!  呢款湯包ok, 仲有兩包, 下次再煲.  的湯咁甜, 哈哈, 我隻烏雞加湯骨當然出咗好多力啦.

拎返嚟嘅雞, 再用鹽擦擦外皮, 蒸十分鐘加熱, 一樣咁滑.  切得好的, 放靚的, 食時都覺得開心的.

呢件小燒腩就差的, 我要的皮脆, 再翻焗, 但的肉唔記得包錫紙, 咁就乾咗的啦.

 
蒜頭豆豉辣椒蒸左口...美味

 
炒菜心苗

四餸一湯, 呢餐都好豐富吖!