蘿蔔糕

January 29, 2014, Wednesday

今日放工,亦即是我的農曆年假開始. 老闆十分好人,多放我們三天假期.  明天年三十一天, 初五初六兩天, 共三天.  而我再多攞兩天假期, 放到初十.  同加拿大回來的家姊姊夫一齊去旅行.

放假頭幾天, 就非常忙碌, 變回家庭主婦, 過年的東西未買, 千萬樣野未做.

今天放工回家, 食完晚飯便要馬上開工.  每年都留到年二十九或年三十先開始整蘿蔔糕芋頭糕, 跟著包好去送禮.  我在家中排行最細, 整好送比媽媽哥哥姊姊.  今年二哥及三家姊都回香港過年, 要做多一點呀!

忙起上嚟就變大頭蝦, 樣樣預備好, 先發覺唔記得買澄麵...即刻飛車出去買, 好彩雜貨鋪未關門, 因為超市無得買架.

 
我喜歡落澄麵, 因為做出嚟嘅蘿蔔糕, 芋頭糕有少許"彈力" 食落唔會好似鷹粟粉咁有的"糊口"嘅感覺.

不過整蘿蔔糕各有各家的做法, 只要自家鍾意食就得啦.

 

我整糕只落臘味及蝦米, 無落冬菰, 做起嘅糕如果唔係即食, 可以keep 耐的.

材料: 

白蘿蔔(去皮切條後) 4公斤

沾米粉640g (與澄麵拌勻), 分成兩份

澄麵 16湯匙 (下次要量清楚幾多克, 平時一湯匙係15克, 但量粉不一樣, 無咁重)

潤腸4條, 臘腸4條, 臘肉一條, 蝦米一碗 (臘味汆水切碎, 汆水後容易切好多)

雞湯1公升

調味: 胡椒粉, 片糖一小塊(真係一小片好啦, 我今次落大片咗呀!)

型爸一定要食有咬口的蘿蔔糕(食落要見到蘿蔔), 去年用特粗條刨來刨, 但Ruby話太慢, 佢話用刀切最好, 唔使十分鐘就切好.   的洗洗切切, 有Ruby幫手真係快好多架.

4公斤分了兩盤, 要煮兩次, 因為個鑊唔夠大呀!

 

臘味爆香, 迫的油出嚟, 但又唔好爆得太乾, 的臘味無哂油蒸起的糕唔好食.

用的臘味油爆香的蝦米

 
加蘿蔔一齊炒, 有蘿蔔水加蘿蔔水, 蝦米水,

跟著加2杯雞湯,一小片片糖(我用手撇, 呢片大塊咗)煮腍.   離火(最重要)

將其中一份(320g 沾米粉+8湯匙澄麵)拌勻了的沾米粉澄麵慢慢篩入

如果太稠可以加少許凍滾水, 但絕不可太稀, 蒸起會太軟

先整好4底, 放蒸爐下層.  (我呢的膠盒可以受高溫, 蒸爐只有一百度, 無問題, 但用鑊蒸就唔好啦)

跟著再整多4底放上層.   一爐過蒸一小時

出爐啦, 每底大約有830克, 比出面賣的一斤裝還要重呀!

以前整蘿蔔糕為了送禮漂亮, 會留起三份一臘味放面.  但姊夫話唔實際, 煎糕時的臘味跌哂出嚟, 煎到燶哂浪費掉, 現在都不會了, 真材實料, 全都放到糕入面.

的蘿蔔糕入爐時, 就開始整芋頭糕....