韓式金菇牛肉年糕鍋

July 5, 2015, Sunday

今日行完山好攰, 食完晏返到屋企由頭洗到落腳, 再敷個mask...好正呀!

休息咗兩個鐘, 雖然雙腿仍有的軟, 但體力都返哂嚟, 跟著要整晚餐啦.

晚餐預咗林老闆嚟食(因林太及林小弟已飛咗去英國), 林老闆要十號先飛, 佢一個人响香港, 梗係要照顧吓佢.   再叫埋組長同佢太太過嚟食, 多兩個人都係多兩相筷, 佢工人姐姐星期天放假, 今日又行到好攰, 兩個人唔好煮過嚟食啦.


我上次開咗包韓式年糕, 今日繼續整金菇牛肉年糕卷, 不過唔係煎加黑椒汁, 今次整韓式牛肉鍋.


整韓式鍋就要韓式麵豉醬同辣醬啦

我先用水開溶的醬, 二比一比例, 即韓式辣醬兩湯匙, 配一湯匙麵豉醬

韓式鍋梗要加的泡菜.   家裡只有椰菜, 就用椰菜切碎.

繼續將浸軟了的年糕, 跟金菇一起包要牛肉裡面

包好一大碟

我用鑄鑄鍋加入清雞湯

跟著加入麵豉辣醬水, 加椰菜, 金菇, 豆腐煮幾分鐘

最後再加入肥牛年糕卷

其實的年糕可以唔包, 同的肥牛分別放入鍋內, 煮滾就可以.   但我想每食一塊牛肉的都要吃一件年糕(絕招嚟架). 

二公子問點解呢個鍋好似咁快就食得飽, 咁梗係, 如果牛肉分開放, 以二公子型爸呢的牛魔王, 一挾就幾塊牛似入口, 多多牛肉都唔夠食.   我包了大約40件, 如果唔加年糕, 點夠咁多人食呀!
連埋的湯, 用嚟撈飯仲正呀! (呢的咁高熱量要食飯嘅動作, 要冬天先攪得掂).  

除了韓式金菇牛肉年糕卷, 再整了幾個小菜

麻醬青爪拌海浙

潮式豆醬凍烏頭


蝦仁炒蛋


清炒芥蘭

已經叫咗林老闆唔好買, 佢佢又响德龍買咗一盒燒肉及半隻燒鵝

組長同太太唔好意思空手嚟, 又拎咗剛在大埔墟街市的墨魚刺身.


六個人的晚餐, 結果又變得咁豐富......

啊,  唔止呀, 仲有個鹹菜排骨胡椒豬肚湯呀!   好彩記得叫佢地飲, 不過就唔記得影相.

又食到大家捧著個肚.