July 1, 2015, Wednesday
呢排真係好熱，早上八點幾已經31度，我地住新界地方，溫度仲要高一兩度。咁熱嘅天氣，應該好好留喺屋企嘆冷氣，做咩仲要行山呀???
本來今日都無諗著行山，因為八個人之中，其中一對組員外遊，另一對夫婦要陪吓的仔女，組長太太又要返工。剩低組長，我及型爸。 群組Whatsapp時都話人太少唔去啦，但其實我地三個心中都有的想去行。 哈哈，結果私底下聯絡，三個人都去，先去拜神，再去行一個短途，行吓郁吓出出汗。
組長要開車送太太去搭車，我地今日晏少少9:15am出發
我地買咗呢幾札香好耐啦，諗著去觀音廟同關帝廟簽香油，點知買咗的香後就無行南涌鹿頸，去咗大埔滘行林徑。 今日趁機嚟拜拜神。
見到呢的風景，真係心曠神怡啦。
先去觀音廟
行埋下面拜五位龍王，呢道真係好靚
跟著再開車去埋協天宮拜關帝
我地就開車去到南涌郊遊徑。
先睇吓幅地圖，如果我地沿紅點行，好遠架
但我地無諗著行咁遠，只係短程行到水潭就回程啦。 出發時10:30am
南涌郊遊徑一開始行就係呢的山路石級，同梧桐寨一樣。 但同是山路，呢道的路闊的無咁斜。梧桐寨的路難行好多。
一行上山路，的溫度當堂好似低咗幾度。由觀音廟去到恊天官至郊遊徑起點，全都是石屎路，天氣熱，的熱氣由地面蒸上來好辛苦，但一行上郊遊徑，馬上無呢的被蒸嘅感覺。
我地行咗差不多半個小時，已經去到水潭，嘩，已經有人响道游緊水
我地响呢道休息幾分鐘又繼續出發, 我地諗著行到另一個水潭，先回程。
呢道都有警告標示，如果的水蓋過石澗就千祈唔好經過。
講真，我地行山啫唔係博命，落雨天有危險就唔好行呢的山路。
呢度有個指示牌，去丹竹坑要2.5小時。 我地今次唔會行啦，剛剛行嗰段，暴曬都有50%, 我要打傘先得。但型爸唔鍾意帶帽打傘，我唔想佢曬得咁緊要呀，天涼的再考慮。
行多15分鐘就到第二個水潭，呢道比較細又曬，無人响道游水呀！ 因為曬得緊要，水下面的石都長滿青苔，上次去梧桐寨瀑布，的石好乾淨的水又清澈
有的石上面嘅青苔，係金黃色。組長話佢細個時出外玩擦傷流血，唔敢話比阿媽知，就係用呢的黃色青苔止血（吓...比我就唔敢啦）
回程啦，呢道好多地下都曬到乾哂。
嚟時行咗４５分鐘(連休息時間), 回程就快好多，差唔多半小時就到。沿路走時見到好多人帶埋小朋友(二三十個人)去第一個水潭游水 (個水潭咁細，點塞得落咁多人呀？）
行到落泊車地方，看一看時間，行咗1小時15分鐘，我地的腳程都幾快呀！ 手機嘅溫度係33度，但架車標示室外溫度係37.5度呀！ 快的返屋企沖個涼嘆吓冷氣先得啦。
行咗都唔係好耐啫，但唔知點解覺得好肚餓呀！ 返到屋企第一時間叫Cindy煮的野比我地食。
打開廚櫃，第一時間又係諗起呢款担担麵。呢排係我地嘅新寵呀！好肚餓，每人加多幾隻水餃添。
沖完涼就有得食啦.....水餃担担麵
再加一杯冰涼的蘆薈小麥草
嘆著冷氣嚟食.....大滿足呀！
出咗一身汗，真係好舒服呀！爽呀!
沒有留言:
張貼留言