父親節聚餐

June 21, 2015, Sunday, 父親節

上星期同幾位會外遊嘅鄰居預慶父親節, 今天正日, 都係要繼續慶祝.   做母親的辛苦, 做爸爸的一樣勞苦功高.

晚上聚餐在十五號屋舉行.  我地幾位太太為老公煮一餐, 哈哈, 益咗的後生不勞而獲.   不過佢地唔出街陪著Daddy已經好乖, 二公子要返工, 要大約八點先返到嚟呀!

平時我地聚餐, 有幾位鄰居都係"煮得"之人, 但今日四家人之中, 有兩位形容自己係煮食白痴. 我驚今晚唔夠野食, 結果整多幾碟冷盤.

呢碟唔使煮, 只需要切就得啦.  係油甘魚刺身呀!  在家吃刺身要小心處理.  天氣熱, 要小心解凍, 跟著將冰先放碟低, 鋪上保鮮紙, 切好放上冰面.  切好哂再用保鮮包著放入雪櫃, 上面再加冰.   要保著低溫, 的冰拎到去先掉, 咁就唔會咁易變壞.   呢碟油甘魚超肥美, 我一切落手就知啦.   好快就食哂啦.

 
再整多咗碟泰式生蝦, 又係要好小心保持但溫.   加上蒜頸辣椒, 好味呀!  真係估唔到佢地咁鐘意食生野.

 
仲有一碟涼拌鮮魷, 呢碟叫叫Cindy整, 我一個人做唔到咁多呀!


哈哈, 仲有一碟凍食煙薰豬肝, 呢碟又係只需解凍之後切片就得.  第一次食, 又唔錯喎.  呢的咁危險嘅食物, 都係要人多每人一兩片就好啦.

 
跟著仲有兩碟熱菜.    我昨天煮了一大鍋咖哩牛筋腩分咗兩煲, 一煲拎咗去奶奶屋企做節, 另一半煲就留番今日.

 
仲有一款新餸添.   係金菇牛肉韓式年糕卷呀!  金菇牛肉成日都整, 但今日加咗料.

 
嗰日包金菇牛, 覺得好單調, 入面應該再包的野.   諗吓韓式年糕都係一個幾好選擇, 的韓式年糕短短細細粒, 只需要用熱水浸軟就可以捲, 捲起每條都漲卜卜, 幾靚, 又容易煎.   食落都唔錯架, 外面牛肉味濃, 入面依依韌韌淡淡地, 呢個配搭唔錯.   對於我地"無飯件夫婦" 有的米氣落肚.  下次要再整.

另一位部屋靚太唔識煮,  叫佢整最簡單的凍烏頭

而女主人叫工人姐姐整咗好幾碟餸, 有义燒, 炒菜心.

 
大芥菜排骨煲.  不過第一次整拎咗出嚟食食吓發覺唔記得落芹菜, 又拎入去煮過, 拎返出嚟時又真係靚咗的.

而林太整咗冬菰炆鴨腳

 
蘿蔔炆牛尾, 兩碟都大大碟呀!

連埋幾個後生仔女, 我地有12個人, 好豐富呀!
 
 
 唔止食物豐富, 我帶了自家製梅酒, 林生帶了whisky, 林太帶了柚子酒

行山組的哈叔, 送咗一大盒糉加一大盒荔枝比我地大家一齊食

的荔枝好靚, 係糯米糍嚟架

又甜又細核, 連平時唔食荔枝嘅型爸都食咗好多粒.  有人話食荔枝食幾粒會上火, 但食多十幾粒就無事....哈哈, 咁個個都食十幾廿粒.

主人家嘅工人姐姐整咗一款印尼甜品凍南瓜.   睇落係蒸熟嘅南瓜, 加上椰汁及鍊奶,  甜甜地.  不過由冰箱攞出嚟, 好冰呀!

跟著再嚟一個腐竹南瓜糖水.   主人家買咗個大南瓜, 一次過整哂佢.

跟著主人家個仔仔用芒果整芒果沙冰, 跟著再沖capsule咖啡比我地飲.

食得款式太多啦, 食到個肚都有的痛呀!

不過大家好比面, 我只需拎的吉碟吉煲回家, 因為全部食哂呀!  其他剩低嗰的我就唔需要理啦.  佢地話的野剩下來都係我嘅問題, 整咗咁多碟, 食哂我整嗰的, 其他的咪有剩囉.  哈哈, 天口熱個個都鍾意食的生冷野之麻.