東京自遊行 - Day 4

July 14, 2015, Tuesday

眨吓眼又到旅程的第四天....哈哈, 第一天行咗超過二萬步, 第二及第三天都行咗超過一萬八千步, 今日唔使路啩.

今日會坐黃昏18:20班機, 仲有大半天嘅時間可以繼續買繼續食.


八點幾由酒店坐的士去新宿地鐵站, 安全計, 預買咗下午坐Airport Express 嘅車票, 如果到時先嚟買, 無票要坐其他要轉接嘅車就麻煩啦.

買完車票, 跟著就去做傻野.....

咩野傻野, 咪去高島屋百貨公司門口排隊囉.   去到九點十五分....唉吔, 咁長龍唔知排唔排到呢?

為咗排隊, 我同型爸早餐都要分開食.   排隊對面, 1樓有間Cafe, 叫St. Marc Cafe   型爸先去食, 佢食完話杯咖啡同三文治都唔錯, 跟著就輪到我去食.

呢件三文治都好經濟, 同便利店買差唔多, 280yen, 杯咖啡250yen, 但套餐就減60yen.  加埋消費稅都只係507yen.  可過呢件三文治無我响便利店買咁大份, 只有兩件.  不過呢份點都新鮮的啩.

食完就返去繼續排隊, 我地後面只係多咗對年青男女.   排到差唔多十點....店鋪入面有位會講英文嘅女士, 佢話今日只有36個袋供應, 每人可買兩個, 但前面嘅人龍已經超過18人(有二十幾三十人吧) 我們排到去, 可能都買唔到, 其實佢係勸我地無需要再排.   吓, 唔係吖麻...真係no luck?

不過排隊時我聽到前面有一個家庭男女連小朋友共八位一齊排(佢地早上07:30到), 我唔信佢地個個都買, 跟著前面有兩位聽到嗰位小姐講之後,因為要趕搭飛機離去, 咁我又排前咗兩位.  都已經排咗45分鐘, 一於繼續排吓啦.

到十點百貨公司開門, 我地入到去, 見到Issey Miyake Baobao個counter, 只有兩種顏色, 銀色及黑色, 第一位入去嘅女士(聽聞佢前一晚响道瞓, 唔知係咪真). 我見佢第一時間一手攞咗三個銀色袋(今日只供應三個銀色), 跟著就只剩吓黑色....

哈哈, 呢個時候我諗我有機會買到, 因為唔係咁多人會買黑色, 由其是第一個Baobao.

結果我買到啦, 銀色我已經有.  黑色我無, 仲可以配多個wallet.   我幫朋友多買了一個.  如果我再多買一個, 後面排嗰位女士就無啦.   佢都係用緊Baobao, 咁留番一個比佢買啦, 大家開心.  咁跟著後面排隊嘅就無啦.   嘩, 呢道的sales咪好著數, 只係一個鐘就買哂, 咁下午唔使做啦.

買完要坐的士返酒店啦, 我地要十二點前check out, 如果唔係要比附加費, 咁無謂啦.  Check out 之後的行理可以留喺酒店.  出去食完飯返嚟攞埋的行理去搭車出機場, 時間應該啱啱好.

 
又行出去歌舞伎町搵食, 呢道附近好多食肆, 好多選擇.   型爸見到呢間寫著高級活魚, 佢話就呢間啦.

 

唔入去唔知, 入面好大架, 仲有魚缸養著不同的海鮮

型爸見到咁大缸龍蝦响我地前面, 佢話唔食龍蝦刺身點得呀！(佢見到的海鮮有的失控）

 

呢間餐廳仲係我地去咁多間餐廳唯一有供應凍綠茶. 呢幾日天氣好熱，平時唔好飲凍野嘅我都不停飲冰水。

侍應送上餐牌，型爸想點a la carte 刺身，但侍應猛咁指著個1,000yen 刺身定食，唔通佢叫我地要套餐抵的。

結果我地要了一隻龍蝦刺身，隻龍蝦細細隻，得幾嚿肉, 但砌得好靚。　咁啱架啦，唔使食咁多。 我地問龍蝦頭仲有無其他食法(响香港會叫佢地煲粥), 侍應話no, 咁算啦.


跟著要了兩隻海螺，一隻一碟，連肝同膽都比埋我地食。　好爽口呀！

份刺身套餐送嚟啦....真係好抵食，午市套餐都整到咁靚

我地另外叫咗一個豚肉火鍋，仲未送到嚟，咁型爸又再睇餐牌

我地叫嘅刺身定食，每日限賣10份，　型爸話仲有個壽司套餐，都係一日限定10份, 咁抵食不如叫埋佢啦....型爸，抵食都要食得落先得架，拿，壽司我幫手食兩件，你食得落就叫啦。型爸二話不說就叫了。

呢個時候，我地叫嘅豚肉火鍋嚟啦, 都好大份喎。

估唔到，呢的豚肉，好有肉味，呢個鍋好味喎。　

跟著壽司套餐都嚟啦，個餐仲配埋茶碗蒸蛋，又係好好味。

結果我食咗三件，型爸發揮佢嘅小宇宙，全部食哂。

埋單JPY10,344. 真係抵食。　最緊要型爸食得開心。呢間又要留起咭片，下次有機會再嚟。

食完返酒店攞埋的行理，最緊要叫酒店响冰櫃攞番急凍咗嘅明太子呀！

預早call嘅的士到咗啦，大喼細喼搬上車。

因為塞車關係，本來唔使跳表嘅車程，跳咗幾跳到1,090yen, 再加上call車費410yen, 呢後車程要1,500yen呀！

 

好彩預鬆時間，第一次搭Airport Express, 都唔知响邊道入。問咗三次先去到月台。

哈哈，由兩個喼變四個喼，喼中喼真係發揮好大作用。型爸嚟時一個喼，走時都係一個喼，仲係細嗰個。其他兩大一細嘅喼，入面的野都係我架！

上到車，的位都算寬敞舒服, 比日航的機位更寬闊。大約要九十分鐘先到機場。我們在新宿上車，跟著在池袋同橫濱都停站，很多人上車。

到咗機場，過關入閘都好快，仲有個多小時先上飛機，又去買手信。相信日本機場係最多人買手信嘅地方, 因為排哂長龍.  去到閘口上機前, 都繼續買.　可惜，我們平時買開的whisky山岐18年及竹鶴21年被國內同胞搶到無哂。　同一枝山岐18年，我地買咗好多年都係JPY16,500, 而家改咗個包裝要賣JPY50,000.  哈哈，梗係唔買啦。咁多蘇格蘭威士忌，咁嘅價錢，大把選擇啦。

買完一大堆手信，跟著見到呢間餐廳...咦，我地第一餐早餐响木更津outlet, 都係呢間餐廳喎。

　有頭有尾，不如入去飲杯野啦。

哈哈，又食。型爸要了豆奶咖啡，我要了一杯什果沙冰(我見隔離檯兩個鬼妹仔食得好開心, 加一份French Toast.

呢份French toast配香蕉好好味喎。

而我杯什果沙冰都好正，入面仲有香蕉藍莓紅莓同果仁, 好咬口又冰凍呀。

JPY2,040, 以機場餐廳嚟講，真係唔貴呀！

上到飛機，前面坐咗個小女孩, 我地飛嚟東京時佢地一家三口都坐喺我地附近。 嚟時零晨機，個個上飛機都瞓覺，超安靜無問題啦.  但回程時呢位小女孩精力旺盛，整整幾個小時，從未停過口說話.  我聽到佢媽媽話好攰要休息啦，佢都係不停咁講野....　坐正佢後面，真係無法休息，但佢咁可愛，又唔可以叫佢停口。哈哈哈哈。

份飛機餐都ok架。


小食花生, 型爸攪掂

 

 有什菜沙律配意大利醬汁

肉碎凍豆腐

牛肉漢堡飯，我對個漢堡無咩興趣，食咗的飯。

甜品有Ｈaagen-Dazs雪糕

返到香港，又多一個細喼，型爸卒之有收穫啦，响免稅店買咗兩枝蘇格蘭威士忌，送旅行喼一個。

呢次東京自遊行，早機去晚機返，食買玩足４天，我同型爸都好開心。

一出機場就收到二公子嘅whatsapp問我地到未...哈哈，知佢心急啦，唔係掛著我地，係掛著我地幫佢買嗰隻手錶呀！

返到屋企, Loki聽到我地把聲, 由樓梯衝落嚟(本來佢喺二公子房嘆冷氣), 係咁叫係咁跳嗚嗚嗚....知啦知啦, 知道你掛著我地啦.

出去玩得幾開心都好, 回到家才是最踏實的.