傷心酸辣粉

July 21, 2015, Tuesday

今日食晏時間滂沱大雨, 都唔想行咁遠, 走去海鮮站睇吓有無位.   哈哈, 排哂長龍, 唔等啦.  咁文華中心二樓上面都有好幾間食肆, 上去睇吓邊間有位先.

呢道有間傷心酸辣粉, 經過好多次但從未幫襯過


再睇吓呢個招牌真係比佢笑死, 點解攪到好似旺角的黃色架步咁架.

有個二拉架, 皇牌二人套餐都可以考慮喎, 今日咁啱慢麼麼約咗人食晏, 只有我同麻煩鬼, 我同麻煩鬼都算食得辣而慢麼麼就唔食辣.   好啦, 今日就試呢間啦.   等咗五分鐘就有位.

睇咗餐牌都係決定要呢個套餐

嘩, 原來有咁多分店, 不過一間都未幫襯過.

的野送嚟啦.....

每人一配酸辣麵

口水雞

麻辣海帶

麻辣肚絲

 

 齊啦.

食落的麵, 好辣呀, 我地已經叫咗少辣, 但係的麵都仲係好辣.  食食吓, 根本全部都係一樣味道, 無論係麵, 雞, 海帶或者豬肚絲, 全部都係一樣味道.   

的招呼就真係唔掂, 叫咗幾次要杯水, 嗰頭話ok, 轉頭就唔拎比你.  可能唔想我地飲水, 希望我地叫凍飲呀!

碗麵太辣, 食到出汗兼眼淚水都出埋, 唔知係咪咁樣叫傷心酸辣粉呢.

埋單HK$118

唔知係咪辣得制, 我未返到公司就開始覺我個胃同個肚有的痛...

下次真係咪攪, 全部都麻辣.  我有排都唔會再嚟食.