五號屋的部落: 東京自遊行

July 12, 2015, Sunday

一覺醒來, 補充了體力, 精神好多了. 兩個人自遊行, 時間隨心隨意, 八點幾起身, 九點幾先出去食早餐.

昨日check in 時都無留意酒店如何, 裝修以簡約為主. 接待處很多人, 都唔影啦.

去前台問我地要去食早餐嘅地方, 酒店比張圖我地, 由酒店行去新宿車站, 大約要行二十分鐘....唔...唔制啦, 唔想晨早行到身水身汗, 坐的士去啦. 坐的士去Lumine II, 都只係JPY830, 幾十文港幣, 都係要比嘅.

去到Lumnie II, 搵到呢間Sarabeth's, 本來好開心, 見前面只有兩檯客人等位. 點知問吓, 原來前面仲有幾張檯, 只係經理叫佢地遲幾個字返嚟. 本來那位經理叫我地10:45返嚟, 吓, 唔制, 我地寧願企响道等, 結果10:25分就有位, 都只係等咗大約半小時.

但係人龍不斷呀....

等嘅時侯就睇吓有咩野食.

仲有果醬muffins 可以外賣.

嚟呢道食野, 除咗要等之外, 都仲係等呀... 因為叫咗野都要等好耐先嚟. 好彩我地唔趕時間, 慢慢嚟就慢慢食啦....呢個都可能係出面排咁長龍嘅原因.

我要了Classic Egg Benedict

型爸要Spinach Omelette, 我地share嚟食.

呢款Spinach Omelet 由蛋白及鮮奶煎成, 味道淡一點, 要加黑胡椒及海鹽

個Egg Benedict睇落又幾可愛

掃開面頭的汁, 一刀界開, 的流心蛋就流出嚟.

橫切嚟睇, 下面係muffin, 中間係火腿, 最上係蛋. 味道普普通通, 但賣相幾靚.

我要了Cappuccino

型爸要了普通咖啡. 我地覺得呢道的咖啡麻麻, 味道淡, 送來時一的都唔覺係即磨咖啡.

包糖又幾得意, 我地唔落糖, 留為紀念吧.

埋單JPY3,940...算係貴價的嘅早餐.

食完十一點幾, 走去高島屋碰吓運氣, 睇吓買唔買到Baobao....去到只剩最後三個手挽袋, 同款同色, 比三個男仔一口氣買哂, 最後只剩兩個黑色wallet, 唔買啦.

跟著就行番去酒店嗰邊嘅化妝品店, 星期日早上反而無咁多人, 可以買我想買嘅野, 唔使迫.

跟著就去激安之殿當, 又係無咩人, 可以慢慢揀.

行到一點幾, 我地要食晏啦.

搵番昨晚遊牧隔離間拉麵店

都仲係有人排緊隊, 唔理, 我地都排啦.

排緊隊時, 睇吓一陣間食咩先

排呀排, 原來排到落下面都仲要等, 不過如果入到餐廳入面, 就可以坐低等有冷氣

呢道的位好似戲院的卡位咁...

唔怪得次咁嘈, 原來有隊live band彈音樂.

卒之等到位啦, 等呀等, 等咗成個鐘呀!!!

等到坐低時已經差不多兩點, 真係又攰又餓, 樣樣都想食

當我地叫了兩款刺身之後, 再叫兩碗烏冬. 侍應好似問我地碗麵要大, 中, 小, 跟著講咗我地唯一識聽嘅英文...price no change....吓, 大中細都係一樣價錢, 我地好肚餓, 梗係要大啦.

好彩叫咗刺身, 唔係真係等到餓死, 等咗好耐兩碗麵先嚟

馬肉刺身, 第一次食咋. 本來叫了最貴嗰款JPY3,150, 但埋單見張單JPY1,890, 侍應應該係幫我地落咗細份嘅馬肉刺身.

我地要了一客2-3人前嘅刺身, 佢分開二人上

個賣相好精緻, 又抵食.

Live bank演奏, 睇張leaflet, 平日只有晚上時段八點及八點四十分演出, 每次二十分鐘. 今日係星期日, 加開下午埸, 所以先有機會聽到....不過只係演奏純音樂, 喜唔喜歡就見人見智啦.

我要了明太子冷烏冬...送到嚟真係呆咗, 勁勁勁大碗. 個碗真係有12" 闊. 用我之前影張相對比, 的烏冬多咗應該有3倍.

用把扇同筷子作比較....碗麵真係好大.

我碗麵先嚟, 分咗一小碗比型爸. 的烏冬撈滿明太子, 真係好好味. 唔會因為烏冬多咗而唔夠明太子. 的明太子多到食唔哂.

到型爸嗰鍋烏冬送到嚟....唔係一碗, 係一煲.....點食呀!

哈哈, 我地要了大碗, 唔食又唔得, 盡量啦...辛苦你啦,型爸. 型爸話本來呢鍋烏冬好味的, 可能都會食得哂, 但佢食過我碗明太子烏冬好好味, 呢鍋烏冬就變得淡而無味. 咁我咪張我碗底入面嘅明太子比佢撈烏冬.

真係price no change 架, 都係收番我地普通價錢, 不過我同型爸都飽到呆咗, 最後鍋烏冬都食唔哂呀!

不過呢間麵店, 下次有機會都會再嚟呀!

食完實在太飽, 仲拎著大包細包响代妝品店及激安之殿堂買嘅戰利品, 返酒店休息一吓先, 唔係真係行唔郁呀!

休息了一個鐘我地又再次出動. 今次由東新宿去涉谷

問清楚酒店我地應該坐邊條線

的地鐵其實都幾複雜, 要好小心認著邊個出口.

我地去涉谷做咩, 係幫二公子買錶呀, 佢上網check咗, 呢道賣得比香港平呀. 我地上到三樓寶石廣場, 見到其他港人家庭, 佢地一口氣買三隻呀! 三月時去大阪那邊買唔到, 無貨, 價錢也較貴. 但呢道比香港定價平兩三萬, 比水貨都平兩三千....最緊要係有貨, 最後一隻. 即刻whatsapp二公子問佢買唔買....一句買....咁就買啦.

買完我又去search睇吓呢附近有無Baobao賣...Parco Plaza II....點知去到又係吉櫃, 只賣剩黑色wallet.

跟著去邊好呢, 買完貴野就去買平野啦....search吓附近有無100yen 店... Daiso, 有, 幾分鐘路程就得. 用google map教我地點行. 哈哈, 好彩買咗張網咭嚟, 我用型爸share比我嘅wifi, 好方便呀! 反而型爸用張3G咭, 用唔到Google map.

行吓行吓, 又腳軟, 落地鐵站前, 先去咖啡店休息吓, 我咩都唔要, 只要水, 因為個肚未飽完.

休息夠就搭地下鐵返東新宿

點知我地唔識聽的廣播, 上咗架急行車, 明明坐咗三個站, 下一個站係東新宿. 點知型爸話睇著佢飛三個站. 結果我地要落車再坐倒頭車返東新宿....今次問咗幾個人, 唔會錯啦.

拎哂的野返酒店, 又要休息一陣先出去食晚飯, 今日又行得好甘呀!

我地九點十五分先先離開酒店搵野食, 今晚唔食紅肉啦....食魚啦. 嚟到日本, 梗係食香港無得食嘅河豚啦. 上網查吓附近有無河豚餐廳.....哈哈哈, 又有呀, 仲喺酒店附近

用goggle map查埋地址, 教我地點行去餐廳