東京自遊行 - Day 3

July 13, 2015, Monday

哈哈, 今早我地慳慳慳, 在酒店房間食早餐呀....其實簡單不過, 買件三文治, 整杯咖啡就攪掂.

第一天來到時, 見到酒店房間內的包裝咖啡好似幾好, Drip on style, 好想試吓.   但呢兩日不斷外出食早午晚, 邊有時間試咖啡.   咁就安排呢個早上, 整杯咖啡, 食件三文治做早餐啦.

我覺得呢個drip on 好似幾好玩, 只要將咖啡包卡在杯上, 沖的熱水落去, 咁就有滴漏咖啡, 濃的淡的, 隨自己加幾多水.   不過加熱水時都要小心, 唔係的熱水好影燙傷手.

整好咖啡, 加埋昨晚在Ministore買嘅三文治, 就係我地今日早餐啦.   杯咖啡都ok架.

 

至於便利店買嘅三文治都幾好味.   麵包超軟熟. 昨晚買回來放入雪櫃, 今日拎出嚟攤一攤無咁凍, 的麵包仲係好柔軟.   買時無留意件三文治咁大份, 有4件不同口味, 即係有4塊方包.   食唔哂呀...又要型爸幫手食多件.

點解今日安排食自家早餐, 原因係今天要去築地, 預備早起, 咁唔想出去食嘥時間....

哈哈, 不過最終都無早起, 呢兩天行得太攰, 需要好好休息, 幾點鐘自然醒便起床,  無需太緊張.   反正對築地市場嘅Auction興趣唔大, 要四點幾起身實在太早.

最終, 早上九點先離開酒店.  為咗省氣力, 唔想一早又行咁多, 我地決定唔坐地鐵, 由酒店坐的士去築地市場.   酒店話坐的士大約需要JPY2,710.   坐地鐵要JPY270一個人, 咁比貴的來補貼的腳骨力啦.

上到的士, 見到酒店附近有間築地海鮮, 如果唔去築地食都可以嚟呢道食呀!

結果坐的士要JPY3,340, 因為有的塞車.

去到築地, 周圍行吓, 見到呢的檔口都無咩興趣, 胃裡的三文治仲未消化完呀!

見到有好幾間店舖, 外面都放咗個勁大魚頭, 500yen, 唔知係一磅定係幾多呢!

型爸見到的生蠔, 可以單一隻賣, 佢買嚟試吓.  我唔要, 我覺得日本生蠔無味道嘅.   哈哈, 型爸一試之後, 佢話我無講錯呀!

行吓見到呢間燒鰻魚店....時間尚早, 一陣返轉頭嚟試....今次呢個trip, 仲未食過燒鰻魚呀!

見到的魚子, 可以試味, 又幾好味, 買兩件比型爸送酒啦.   的茄子又圓又大, 不過無買呀!

搵呀搵, 卒之搵到呢間世界屋啦.  鄰居上次嚟買咗的煙燻木, 佢叫我幫忙買多一包木桶味.   我每款味道都買咗一包.... 一包成一磅重, 八包, 好重呀!

又係善用呢的locker嘅時候, 我地將買咗的野塞哂落個locker (細locker要400yen, 大locker要700yen).  放低哂的野, 我地可以好輕鬆繼續行

十一點幾, 又開始腳軟, 要搵個地方食少少野坐吓.   呢間咁多人等, 唔啱啦.

被碗海膽魚子刺身飯吸引, 我地入咗呢間北海番屋.  

隔離有兩位中年男女在燒烤飲酒, 那位女士不停向我搭訕, 又問我介唔介意佢食煙, 介意都話唔介意啦.  不過見佢飲嘅飲品叫Hoppy, 佢話要溝落的燒酒一齊飲.  不過當時型爸要了啤酒,  下次去第二間餐廳, 先叫嚟試吓.

碗魚生飯嚟啦, 係咪好吸引?  我地叫一碗飯, 嗰位侍應話每個客人要叫一樣野, 咁我地就叫一碗飯加一樣飲品.   我地要留番個胃去食燒鰻魚呀!

我食了三份一碗...型爸又幫忙食剩下的.   我話不如唔好食的飯, 型爸話唔係咁好啫, 食得就食埋啦.  一陣再食就唔好要飯啦.


海膽魚生飯JPY2,900, 啤酒JPY650,呢餐JPY3,550, 已包消費稅.   諗諗吓, 呢碗飯要成HK$200, 有的貴喎.

食完兼休息完, 我地又繼續行繼續買, 行多45分鐘, 差不多整個築地都行完, 咁我地去搵番嗰間燒鰻魚店.


行哂都好似只此一家純食燒鰻魚.

鋪入面好細, 只有十張八張檯

餐牌只有日文... 但可以同佢地講簡單英語....最後成功要了兩份餐...no rice呀!.... 哈哈, 唔要飯平100yen 呀!

天氣熱, 型爸都係要啤酒,  咁食燒物飲啤酒都好嘅, 我飲少少陪吓佢.  呢幾日天氣好熱, 最過好似成40度, 我地已經不斷飲水降溫.   不過天氣熱都無香港熱得咁緊要.

先送上送酒前菜, 係鰻魚肝, 又幾好味喎.

跟著份餐嚟啦.

有串燒鰻魚腸

呢道成半條鰻魚

仲有個鰻魚魚鰾腸肝湯...

佢地真係將整條鰻魚用哂, 我相信的魚頭魚骨都係用嚟煲湯, 個湯好清甜.

埋單兩份餐加啤酒JPY5,700, 已包消費稅.   呢餐覺覺得好抵食呀!  咁嘅價錢, 香港食唔到, 仲係燒鰻魚專門店.

食完, 我地去Locker拎埋的野就諗著搭地鐵返酒店先放低的野.

先認吓地鐵圖返酒店

買了車票後, 型爸話不如唔返酒店, 費事嘥車錢同時間.  我地去到每人景點, 將的野放入locker咪得囉.   本來諗著先去淺草寺再去晴空塔, 但去晴空塔要270yen, 同返酒店一樣, 咁就先去晴空塔, 回頭再去淺草寺.

點知去淺草呢條線, 要响藏前站轉車, 呢個站轉車, 又要上又要落

仲要出埋閘, 行兩條街, 再落番另一個地鐵站轉車.  真係要命呀.   如果我地今朝搭地鐵去築地要咁樣轉, 我地一定改咗下午呢個行程.

轉完車都唔止, 跟著應該去到押上呢個站落車...點知到站時, 整個站都無"押上"呢個漢字, 全部都係日文, 我地無落車, 結果又坐過龍, 去到老年咁遠的下一站.  跟著又要去另一個月臺搭倒頭車回來....哈哈哈, 我地淨係搭地鐵都賺哂啦, 搭一個站要180yen, 咁來回都賺360yen (唉, 係唔係好阿Q呢!)

雖然花的時間, 都係去到晴直塔嘅.

第一時間去開Locker,  晴空塔的Locker用電子鎖, 又要學吓點用.   不過佔用率都好高, 有八成的鎖已著燈, 即係已經比人用緊.

經呢個地下鐵折騰上上落落, 加上拎著咁多野, 真係好攰, 放哂响locker, 大解脫呀!

上到去shopping mall, 行咗一個圈, 見到間餐廳, 不如入去飲杯野坐吓.

都無留意呢間係咩餐廳, 但坐落先見到餐牌, 原來係卡樂B餐廳


平時呢間餐廳大排長龍, 今日星期一較少人, 我地真係無揀錯, 安排星期一去築地, 晴空塔, 淺草寺呢的旅遊地方.

我地都唔係想食野, 所以只係叫咗一份薯條

另外叫一杯飲品, 咁我就可以不停咁叫佢枇比杯冰水我.

叫咗薯條未嚟, 出去前台小賣部睇吓有咩薯條賣....嘩, 呢隻咪好似Akiramay同事上次想買嗰隻北海道限定薯條.   即刻Whatsapp Akiramay.....原來真係, 咁又要買啦.

薯條到啦, 都好可愛喎.  有三款醬汁可以用薯片/薯條醮嚟食.

食呢餐就好平, 都只係JPY1300.

但買薯條就買咗萬幾yen, 型爸記掛著二公子, 咩野味道都買的.  買咗十幾盒, 又要拎, 好彩唔係好重啫.

跟著我地行出去想上晴空塔, 哈, 其中二間有晴空塔嘅模型, 影張相先.

但去到票買票處, 星期一都超多人排隊, 我同型爸決定唔上去啦.

响花園外面搵個靚位, 要瞓响道先影到呢張.

跟著經過見到Baobao counter...只買剩三個化妝袋....唔買啦.

落去Locker攞番的野, 我地又去下一站淺草寺.

今次近的, 只需要搭兩個站, 由押上去淺草, 無需要轉車, 簡單好多.

不過去到淺草, 又要將的野放locker, 今次一個都唔夠, 要兩個先放得哂的野.

睇咗地圖, 認著的方向

出到地面都要認著, 因為回程都要嚟呢個出口攞番的野.

星期一, 淺草寺都唔少人.  如果假期嚟, 咁咪仲多人!

 

行去淺草寺前都係的商店, 好多間都賣人形燒, 但我地對呢的食物無興趣, 仲有的日本手工藝品, 都係無興趣.

入去行吓拜一拜就走啦.

由廟上面影番落嚟都幾靚

離開廟前洗洗手

跟著我地去行商店街, 呢道影晴空塔仲靚呀!

商店街的野唔啱, 我昨日去涉谷嘅100yen 店好細, 買唔到我想要嘅碗架.  Search 吓淺草呢附近有無Daiso先....哈哈, 點知又有喎, 行6分鐘就到.   呢間Daiso好大, 搵到我要嘅碗架, 湯勺, 又買咗的唔等使野, 又一大袋.   無辦法, 折合大約HK$7, 唔買點得.

跟著走啦, 落去locker攞埋的野, 就搭地鐵返酒店, 東新宿站

今勻又要响藏前轉車, 上上落落, 出閘入閘, 不過早上試過一次, 今次轉車都問題唔大....只係要不停行啫.

我地拎著咁多野, 返到酒店真係攰死.... 攤响張床休息咗一個鐘先再出去.

晚餐我地想搵間居酒屋飲杯野食吓串燒...但搵咗好多間都覺得唔理想, 其中一間入到去, 竟然話佢地係"炸"串燒, 唔係"烤"串燒, 仲指著的中文比我地睇, 應該係之前比人投訴過啦, 咁我地梗唔幫襯.

最後求其入咗一間小店, 呢間係用炭爐燒的, 全店食雞串燒

鋪仔只得咁大, 要坐高腳吧椅...  地方好迫, 唔like 呀, 不過已經入到嚟坐低, 個老闆又好客氣招呼, 隨便叫的野食先啦.

型爸要了啤酒, 我見餐牌有Hoppy, 即刻叫嚟試吓

送來半杯燒酒, 加入Hoppy後, 只係好淡味嘅麥味梳打水, ok 喎, 啱我.

老闆送上一碟菜, 佢話係table cost, 即係每檯都一家要比錢

我地叫了六款串燒 (雞肉, 雞肝, 雞腎, 雞軟骨....) 加一串燒辣椒.  但係的串燒全部一樣味道, 的雞串無醃過, 只係靠燒時加上豉油.

坐得唔舒服(如果的男士食煙的話, 真係焗死呀, 而且鋪面用炭燒, 好大煙味呀), 的串燒又麻麻, 食完埋單, 決定轉埸!

呢餐都係JPY2,957啫.

出到去行咗兩個街口, 見到呢間Yakiniku Blackhole, 個門口咁型, 就去呢間啦.

 
呢道的裝修唔錯, 去到啱啱有卡位, 可以坐得舒服的.

 

 

有英文menu, 呢道主打食牛, 各種不同的部位....仲有牛舌添(今次安排唔到去利久食牛舌, 响呢道食頂著先)

我地剛食完雞串, 唔叫咁多, 只係叫幾款食少少


型爸要了啤酒, 我要了黑糖梅酒, 又幾好飲喎.


呢道都有table cost (cover charge), 都係椰菜沙律, 只不過呢道的椰菜刨哂絲, 加咗的沙律汁味好多.

 
 要了牛舌(可惜係薄切, 好想試吓利久的厚切呀)

 
兩款牛肉, 加一碟豬肩胛


的牛肉牛舌覺得唔貴, 反而呢碟生菜連醬仲貴過碟豬肩胛

呢款黑胡麻醬都好好味

慢慢燒慢慢食都幾過癮

的牛肉又真係幾靚

食咗好少野, 埋單唔使一萬yen

食完每人送包除口氣糖....呢張咭片要留低, 下次有機會再嚟食...原來呢間都有好多間分店呀!

跟著慢步返酒店...型爸睇吓隻手錶, 今日又行超過一萬八千步呀!   呢三日每天都行咁多, 每日都好似行兩次山咁.... 如果唔係呢半年每個星期日都去行山做鍛鍊, 呢個trip咁行法真係頂唔著呀!

實在太攰, 明早起身先執行理, 快的覺覺豬先.   咪著, 究竟今日食咗幾多餐?