五號屋的部落: 東京自遊行

July 11, 2015, Saturday

本來預算去東京五天遊, 點知蓮花襲港, 原本星期五10:40am出發的飛機, 延遲到星期六零晨02:30am, 足足遲了16小時.

還好今次機票同酒店分開訂(多謝Akiramay同杉山小姐的幫忙), 機票無得改, 但酒店房間可以取消一晚, 可以慳番一晚酒店錢. 亦都買了旅遊保險, 飛機延遲十多小時應該有得claim. 哈哈, 少了半天時間, claim 番少少錢作幫補吓啦.

好怕坐零晨機, 成晚都無得瞓, 到達目的地時會眼瞓到呆哂, 唔係我同型爸出去吃喝玩樂要舒適的原則, 但天氣嘅野無得控制, 寧願延期總好過九宵驚魂.

零晨十二點幾到機場, check in 時, 日航每人送咗一張HK$40 cash coupon, 但機埸大部份餐廳都已經關門, 地勤小姐話只有麥當勞同Starbucks收呢張coupon, 仲要即時用....咁即係無選擇啦.

咁即時用就即時用啦, HK$40 coupon, 買咗一杯green tea latte, 兩包杏仁條, 一包麵包條, 跟著先入閘. 哈哈, 好似賺咗幾十文咁.

入閘後仍有時間, 去airport premium lounge坐吓, 但大部份食物couter差唔多收哂, 只剩下乾糧杯麵咖啡, 咁食碗杯麵做宵夜啦.

今次帶咗蒸氣eye mask上飛機, 飛機一起飛就帶個eye mask睡覺, 要爭取時間休息. 呢個時間空姐都好識做, 熄哂燈, 個個人都好攰要休息. 睡了大約兩個小時就給空中小姐嘈醒...她們要開始serve早餐.

五點幾, 見到都唔想食呀!

一早食雞飯!!! 頂唔著啦, 吃了幾口冷麵及沙律, 夠了

早上七點十分降落日本成田機場, 時間早, 機場唔係太多人, 很快便可過關, 行理亦出得很快, 哈哈, 呢的算係坐零晨機的好處吧. 攞完行理, 第一時間去買車票

開始第一天的行程, 由成田機場直接去木更津三井outlet, 因為酒店要求三點後才可以check in, 唔想一早去到新宿周圍貢嘥時間.

好多年無嚟東京, 完全無哂觸覺, 只是出發前做了幾天資料搜集, 嚟到機場再問information.

去到北面第二閘口, 11號車站. 呢個站口有去不同路線嘅車, 但唔需要擔心, 我地show張飛比個站長睇, 佢叫我地坐低等, 車到會叫我地上車.

巴士到啦, 直去木更津三井outlet (中途停兩個站). 大件行理放入巴士車下行理架, 有行理牌.

要個多小時才到, 上車又繼續休息, 瞓唔著都要閉目養神. 全架車只有六個乘客, 兩對港人夫婦(包括我地), 仲有一男一女日本人. 兩位日本人就响中途站落車, 而我地兩對夫婦就直到outlet才下車.

大約十點十分到達木更津三井outlet, 第一時去間搵locker. 先將我地兩件行理放入locker, 咁我地就可以輕輕鬆鬆周圍行. (真係要善用呢的locker, 我地早到, 的locker全部"吉"的, 但過了兩小時, 我們買了一大堆東西想多開一個locker, 已經全滿了)

下了車唔係第一時間去shopping, 而係食個早餐飲杯咖啡先. Outlet嘅food court 要10:30先開, 但呢間餐廳已經一早開咗

坐低影張相, 認著呢個東閘位置, 一陣走時, 都要東閘呢個方向坐車回新宿

每人一杯咖啡, 麵包熱狗share嚟食. JPY1,040, 都係經濟價錢.

跟著就開始辛勞的一天.....買運動快乾衫, 運動褲, 運動鞋.....哼哼哼, 呢個Akiramay, 知我第一天去outlet, Whatsapp我幫佢買手袋.....第二個就唔得架啦, 見Akiramay幫我訂機票訂房, 幫佢買啦. 咁我自己都買番個手袋啦. 跟著杉山小姐又叫我幫佢買手錶....買啦買啦買啦, 滿足哂的購物慾.

行到好攰, 跟著去food court食的野. 無同圍搵食咩好, 見到一風堂, 食碗拉麵算啦.

的湯麵味好濃, 的湯覺得鹹咗的, 無大阪嗰間咁好味. 隻溫泉蛋就幾好味.

午餐JPY2,680.

食完繼續行, 買呀買呀.....今日我就滿載而歸, 但型爸就無咩收獲....佢話我買到野佢就開心(陪我行, 負責比錢, 做埋苦力, 係咪好sweet呢!). 以前去outlet, 通常最後一天先去, 只行得兩小時, 非常匆忙, 今日行足大半天, 收獲又多, 夠哂皮啦. 本來預算坐下午15:20分車去新宿, 結果延後搭下一班16:20班車....太攰, 唔想再行啦.

去番我地早上落車嘅巴士站, 最前面間小屋就係買車票嘅地方. 下午兩點先開始賣票. 呢道一日只有三班車開去新宿, 15:20, 16:20 & 17:40. 搭唔到呢三班車我地就有問題, 所以未夠四點, 我地就先去排隊, 仲可以坐低休息一陣.

一號車站去新宿. 呢班車都載滿八成客人呀!

我地上車前買了一瓶2公斤水,實在太口渴, 碗一風堂麵真係太鹹. 哈哈, 之前有搜集資料, food court 入面有幾間不錯嘅餐廳, 但我地只顧著買不顧著食, 隨便叫碗麵便算.....至於食, 去到新宿慢慢搵好野食啦.

去到市區有點塞車, 差不多六點到達新宿. 我地住Granbell Hotel Shinjuku, 雖然喺新宿, 但跟落車地點相距頗遠, 要行二十分鐘, 推著行理, 一定唔行啦. 坐的士反而好短車程, 唔使跳錶JPY730攪掂.

呢間酒店新起幾個月, 酒店乾淨. 但窗戶及房間都比較細. 住新宿嘅酒店, 都預咗房間好細. 房裡的空間只有床尾的位置. 我們的大行理箱不可以打橫放地上, 只可以直立貼牆. 而喼中喼入面的小行理箱就要放在近窗的梳化上.

留意吓床上, 有兩枝毛巾做的玫瑰花,係酒店送給我們的心意. 杉山小姐通知酒店, 今次係我們結婚周年紀念之旅呀!

睇吓, 第一天嘅收獲, 已經滿一個大喼啦.

在酒店休息了大約一小時, 我們便出發去搵食. 出到去連東南西北方向都攪唔清, 只係拿著地圖向歌舞伎町一番街方向行.

哈哈, 竟然撞番今早同我地同車由成田機場去木更津outlet的夫婦 (反而响outlet咁多個鐘都無見到佢地), 原來佢地嚟過多次, 現在去搵宮奇牛食, 佢話查過附近有一間. 佢地介超咗一間食米沢牛嘅餐廳, 佢話上次嚟食覺得唔錯. 就响附近, 行多幾分鐘就到.... 最後那位太太留低一句.....唔好叫最貴嗰款, 得個肥字呀!

呢, 就係呢間遊牧啦. 型爸手機入面介紹食野Apps, 都有介紹呢間餐廳!

入到去, 卡位已經滿, 帶我地去坐日式房間, 我唔制呀, 好辛苦, 無椅背靠著, 我地行咗一日好攰, 坐得唔舒服亦會食得唔安樂. 最後寧願坐吧檯. 吧檯唔係高腳櫈, 係有背靠椅, 點都舒服的.

餐牌全部日文唔識睇, 但我仲記得那位女仕的說話, 唔好叫最貴嗰款(如果唔係呢句說話, 型爸一定會叫最貴嗰款, 佢一定會話, 出得嚟食就食好的啦). 咁就同侍應, 用有限的日文問佢有咩野dinner set, 佢就指比我睇. 哈哈, 咁就easy, 我地要咗最貴(JPY8980)嘅下一層, JPY4980那一款.