屯門三聖村興記食海鮮

2012年7月13日下午12:47公開累積瀏覽 1273 1

July 8, 2012, Sunday night

下午去按完摩, 晚上六點幾返到香港.  我地今晚決定去食海鮮.  流浮山, 西貢, 鯉魚門都去過好多次, 型爸話不如試吓去屯門三聖村, 佢有個朋友啱啱去過, 話幾好味喎, 咁當然去試吓啦.

我地一家四個人叫唔到的咩野食, 約埋林老闆一家一齊去, 咁就可以叫多的野食啦.

嘩! 去到估唔到咁多人, 的停車場泊到滿哂, 好多車都係周街泊, 外面嗰條街仲double parking.  

型爸朋友介紹我地去興記, 不過去到室內有冷氣就無位, 要坐戶外呀!

坐低之後, 型爸同林老闆去買海鮮, 林老闆臨行前都叫咗幾個小菜比我地醫肚.

椒鹽鮮魷, 西蘭花牛肉, 生炒排骨.


嗰兩碟嚟到估著食都唔記得影, 食咗的野落肚, 先記得攞個杷機出嚟.

初時我地叫燒鵝佢地話啱啱賣哂, 後來有一檯取消, 結果有半隻.  原來呢道的燒鵝好出名, 味道仲唔錯添.

的海鮮嚟啦.....


白焯花螺, 的花螺好靚呀!

豉椒炒蟶子

椒鹽賴尿蝦

油鹽水浸大蜆

芝士龍蝦伊麵底.


呢條魚好正呀!  佢地話叫蘇鼠...蘇眉就聽過, 老鼠斑都聽過, 但蘇鼠斑就未聽過.  但條魚的肉又滑又爽, 好正呀!  型爸話六佰幾蚊, 咁大條抵食呀!

林老闆都話佢地去嗰檔海鮮好靚, 的本地龍蝦又大又靚, 樣樣海鮮都唔錯.

呢餐買海鮮二千幾, 小菜加煮工啤酒汽水一千三百, 咁我地連大夾細九個人, 都算ok啦.

不過唯一我唔喜歡就係坐戶外, 天氣熱食到身水身汗, 我地坐嘅地方又唔夠燈光, 我影相用閃光燈先咁清楚, 當時食都睇唔到咁清楚呀!

的食物做得唔錯, 但下次大熱天時無冷氣, 我就唔係好願啦.  一路食一路出汗, 減哂分.秋涼天可能好的嘅.....不過型爸咁有興緻去的未去過嘅地方食海鮮, 都要支持吓嘅.

食完上車嘆冷氣真係舒服哂.  返屋企仲要食的西瓜降吓溫.