不過食咗幾日, 都已經覺得無咩新意.
每朝都係食一碗粥
另加火雞肉做嘅火腿, 半生熟蛋. 嘩, 差的唔記得講, 呢道的腸仔好難食架, 第一天攞咗番嚟, 連好鍾意食腸仔嘅三仔爺, 個個都頂唔著. 我地每日再目到腸都唔敢掂, 費事浪費啦.
加杯沙巴茶, 就係我嘅早餐
今日先留意個檯墊, 教我地講馬拉話早晨....Selamat Pagi
食完早餐, 我地馬上出發, 坐的士去Gaya Street嘅Sunday market, 呢個市集逢星期日早上六點到中午一點. 我地初時訂咗一早去玩激流, 但為咗行呢個market, 我地將激流延遲到十一點幾先出發.
我地問咗導遊, 呢道有我地想要嘅咖啡豆賣...
去到行咗無幾耐就見到啦. 嘩! 佢地好好生意喎! 不停有人買, 大多數都係本地人
有三款呀! 第一款叫Robusta Coffee (60%), 比較香, 第二款係Arabica Coffee (60%), 比較濃, 而第三款就係呢道最出名嘅白咖啡. 我全部都無放過呀, Robusta 同 Arabica都買咗一公斤, 而Borneo White coffe就買咗兩公斤.....哈哈, 共四公斤.... 真係開心, 呢四公斤嘅價錢, 我响香港只係買到一包古巴咖啡豆. 其實咖啡豆都唔係好貴嘅野, 但係幾經轉接, 落到的商人手中, 我地呢的消費者就要比到好貴. 賺最多錢嘅係的商人, 而種咖啡嘅農民就賺得最少..
跟著就見到的蜂蜜, 馬拉原住民攞出嚟買, 大樽細樽都係一樣價錢, 兩種唔同蜜蜂嘅蜂蜜. 我兩款都無放過, 買咗每樣兩支.
見到佢地整waffle類的東西, 有兩款口味, 我地睇但無食.
行咗個幾鐘的男士就話攰(唔知點解我唔覺嘅), 見到有間cafe, 就入去飲吓野..
哈哈, 點知嚟到呢道, 好似他鄉遇故知咁, 個老闆好熱情, 不斷介紹的野比我地食...
呢道係第一張單 (後來再加咗兩三次單)
佢地自家製咖映麵包, 的都包真係超軟熟
檸檬桔仔冰, 椰汁涼粉冰, 凍咖啡
熱咖啡, 好飲但唔夠咖啡香味
拉茶
我問仍付附近邊道有叻沙醬賣, 佢話我咪有囉. 即刻叫碗叻沙米粉嚟食吓, 又真係幾好味喎.
老闆又拎咗的三十萬道嘅辣椒醬比我地試吓.....超辣呀!
跟著仍又幫我地叫咗份生熟蛋多士
仲即場示範點樣食.
將兩隻半生熟蛋打落碗道, 先加胡椒粉, 再加一茶匙豉油, 拌勻, 加上的多士一齊食. 又或者撕的麵包醮蛋漿嚟食. 又幾好味喎, 大公子即時要多一份.
呢道的桔仔冰加咗檸檬, 真係幾好飲呀!
呢杯椰汁涼粉都唔錯呀!
老闆仲送咗一小碗"辣死你名媽"比我地試吓. 呢個"辣死你阿媽"係從馬拉文Nasi Lemak 翻譯過來
結果幫佢買咗一包冰凍嘅叻沙醬, 一的都唔平呀, 要RM35, 大約可以煮16碗. 仲有一支冰凍咗嘅三十萬度辣椒醬RM10.
食完要返酒店放低的野, 導遊會响十一點十五分嚟接我地去九如河激流呀!
今次車程比較耐, 要一個小時十五分, 沿路見到好多商鋪都關咗門, 我問個導遊點解, 佢話馬拉人星期天通常都唔會工作, 通常只有華人先會連星期六日都開工. 
行咗無耐我地先去加油, Petronas係馬來西亞最出名嘅油公司, 馬來西亞有石油出產, 所以呢道的油價平的. 我問過最少都平香港一半.....唉, 我地香港的油價, 比幾間油公司攏斷, 我地的小市民, 一句聲都無得出.
坐咗個幾鐘卒之到啦, 再唔係我真係會嘔. 我地先食午飯
非常簡單嘅食物, 呢的包餐, 無咩野可以要求, 不過我地都唔餓, 食少少啦...
自貴椰青, RM5 一個
呢道仲有介紹其他活動, 但係我地無時間啦.
整個激流大約個半小時, 當中導航司故意翻艇, 攪到我地跌落水.. 哈哈, 佢之前問過我地識唔識游水啦.... 呢條九如河激流只係一, 二級, 都唔係好剌激啫. 都幾好琉啦. 但我地身處其中, 唔可以帶相機, 無得影相留念, 佢地亦無人代我地影相, 有的可惜.
三點幾玩完就回程啦, 但我地唔要返酒店呀, 我地要去食肉骨茶. 叫導遊drop低我地, 食完自己設酒店.
同導遊打聽過, 佢地話新記質量唔錯, 而好出名嘅佑記最近好多投訴, 仲話的服務態度唔好, 咁我地就幫襯新記啦.
去到四點幾, 已經有肉骨茶賣. 原來早上係廣東仔燒臘飲食店, 晚間就新記肉骨茶.
呢道就唔啱回教人士, 因為全部都係豬肉
呢道除咗肉骨茶, 仲有幾他餸菜可以叫. 嘻嘻, 不過我地嚟"high tea" 唔係食晚飯.
呢道的飲品, 除咗啤酒比較貴的之外, 大部份都係RM3
黃酒蝦
大份嘅肉骨茶RM30
又係唔少得嘅桔仔冰.
分咗都有每人一碗, 配油炸鬼一齊食.
的鳳爪就麻麻啦.
叫咗碗豬腸, 都有十嚿八嚿. 影影吓相就無哂啦.
呢道有肉骨茶賣, RM12一包, 但我無買呀, 我响土產店買咗啦.
食完仲未返酒店, 再去附近超市搜購, 我要買炸蝦片, 睇吓仲有無其他叻沙醬.
最後又買支榴槤雪條食吓.... 一路食一路坐的士返酒店. 嘻嘻, 住市區就有呢個好處.
五點幾返到酒店休息一吓, 我地個個都飽飽, 今晚七點半先落去餐廳食飯.
去餐廳之前, 我地去泳池還毛巾(借咗的毛巾去玩激流), 响四樓望落去, 有的燈光, 但都係黑麻麻, 真係一的夜景都無.
又係同一餐廳食自助餐, 但係今晚少咗好多人(可能係星期日晚嘅關係), 食物都好似少咗好多咁. 同昨天相差很遠.
自助餐點都有的野啱食嘅
食少少啦, 今日有魔鬼魚, 好鹹呀, 又係唔好食.
今日試吓的甜品, 唉吔, 真係唔啱口味, 最好味係的木瓜.
我地都無咩點食, 花咗好多時間同的見過一兩次嘅團友傾吓大家玩咗的咩. 九點幾又上房休息, 又無得游夜水, 泳池晚上八點關門.
我問兩位公子明天游唔游早水呀, 兩個都唔係好想答我.... 佢地想瞓晏的呀!
明天都走啦, 佢地想點就點啦!
沒有留言:
張貼留言