涼拌陳醋黑木耳

October 20, 2013, Sunday

整完鹽水毛豆, 跟著就整涼拌黑木耳. 

今早去街市, 竟然見到平時買菜嘅檔口有浸發咗黑木耳, 睇落非常厚身, 正呀! 買咗返去可以即做唔使浸呀!

咁當然自己要再洗乾淨啦.

 的木耳發好大嚿, 中間仲有的白白地色比較硬, 我用刀切去, 再將木耳切到適當大細.

又要預備一大碗冰水

燒滾一鍋水, 加入黑木耳煮大約3分鐘 (可以撈一塊上嚟試吓軟硬度)

 煮好撈起立即放入冰水降溫. 再撈起瀝乾水份

跟著就要整醬汁, 一早將的涼拌醬汁材料攞出嚟

不過今次唔用鎮江醋, 改用陳醋.

醬汁: 陳醋3-4湯匙, 一湯匙豆瓣醬, 一湯匙蒜蓉, 一湯匙糖, 一湯匙麻油, 一湯匙辣椒油, 一隻指天椒切碎

先將所有醬汁在碗中拌勻, 試味, 味道唔啱就自己調個啱自己嘅口味. 

最後加入已瀝乾水份的黑木耳拌勻.

蓋上保鮮紙放入雪櫃雪凍的.   食時從雪櫃取出可.

我試食已經覺得好好味!  Very nice!

鹽水毛豆

October 20, 2013, Saturday.

今日林老闆同型爸講要改到五號屋食大閘蟹餐, 攪到五號屋即刻要諗諗有的咩野可以整嚟配合個大閘餐.   數數足有十個人, 咁即是要整多幾款小菜先得啦.

如果五號屋可以坐定定同大家一齊食蟹, 最好就整冷盤啦, 食蟹脂肪高, 最好整的蔬菜類簡單小食做前菜.

早上去到街市, 見到有毛豆, 仲有發起木耳, 啱哂, 再加多一碟拍黃瓜, 己經有三碟小食啦.

的毛豆買番嚟, 要浸洗乾淨 (我洗咗三次呀!)

用剪刀將兩頭邊邊的剪去(方便烚時可以入味)

小鍋水, 加入花椒八角及幾片香葉, 加鹽(鹹度各自喜好)

煲滾後加入毛豆, 煮至適合腍到.  不要煲得過久, 否則的豆爆開就唔靚啦. (我見到有幾顆爆開, 即時試味)

 預備一大碗冰水, 將烚好的毛豆撈起即時放入, 將豆的溫度降低, 不耍再變腍.

再撈起瀝軌水份

放在碟上吹乾至無水份

最後加上海鹽及黑胡椒撈勻, 咁就攪掂啦.

整起同剛烚起好大分別架.

我覺得味道啱啱好, 但型爸就話可以鹹少少.

又敗家, 今次唔係LC

 

十月中, 永安有promotion, 又抵受唔著誘惑.....其實我已經唔係即見即買, 睇完返屋企考慮了一晚, 再同型爸討論... 正如我所料魔鬼型爸的答案....吓...咁抵, 鍾意就買啦... (哈哈, 其實我都係想聽佢呢句啫) 今勻又敗家呀!

 

 今次唔係LC, 係Staub呀!

 

嘻嘻, 仲要係兩個

 

有幾隻可顏色選擇, 但個sales 一陣話呢隻色無一套, 要同第二間store 夾貨, 要等十日至兩個星期, 嗰隻色又話無貨, 要check倉, 可能要等四個月.   現貨只有紅色及灰色.  紅色只有一套.  咁紅色就紅色啦.   我有兩個同我食晏嘅男同事幫我拎, 哈哈, 梗係要現貨啦.   送貨都話要兩個星期呀!

 

24cm黑裡, 蜂巢鍋底, I like it.

 

另外一個係27cm oval

 

 都係黑裡

  

其實兩款鍋都唔算係一套, 的顏色有色差, 只係夾埋一齊做promotion.

 

上次買LC, 兩個鍋都是白琺瑯, 今次買黑琺瑯, 開心呢!

 

 

買咗返嚟影完相唔係即刻要養鍋開光, 而係要入番盒, 等我執吓個廚櫃, 再調配吓的位置先可以放入廚櫃呀!

五號屋在yahoo blog的最後一篇

October 29, 2013, Tuesday

真的要說再見了, 今天是2013年10月29日, 明天是2013年10月30日, Yahoo blog將進入唯讀模式, 亦即是說我不可以再在yahoo blog出post了.

由8月30日yahoo公佈將網關閉誌服務, 我仍每天繼續寫我的網誌, 直到這最後一天, 可算長情.  過了今天, 直至2013年12月26日, yahoo blog 將成為歷史, 哈哈, 五號屋的網誌亦成為歷史的一部份.

出完這一篇之後, 我會按制備份, 備份完畢再決定將舊blog搬到那裡.  Weshare sent 了兩次invitation, 可能會將舊blog搬到那裡吧.  至於Tumblr, 曾經在那裡開了個account, 但十分不習慣, 再者Tumblr有幾國語言可選擇, 卻沒有中文, 這樣不重視我們的中國語言, 我不想搬到那裡呢!

九月初己在Blogger.com開了一個新家(http://house5kitchen.blogspot.hk/), 用了最基本的方法, 逐篇copy & paste搬了九百多篇, 但時間同能力有限, 不會將剩下的一千多篇搬過去了.   其他的就希望yahoo備份完畢沒有問題, 到時再搬去另一個家吧.   哈哈, 有兩頭住家都不算為多吖!

這三年多, 我沒有一千幾百萬的瀏覽量, 但以下五號屋的網誌瀏覽量, 對我來說已經是很大的鼓勵, 很開心呢!

統計資料
累積瀏覽    818,860  
全部 回應       3,450
全部 POST     2,456  
累積人次    233,107

曾來探過五號屋的朋友, 多謝你們, 請到新blog來探我吧!(http://house5kitchen.blogspot.hk/)  

等你們呀!

鮮奶吐司- 快速版

October 24, 2013, Thursday night

燉落咗的冰糖雪耳燉木瓜, 順便整埋個麵包.

唔想整的四個幾小時嘅麵包, 今次整嘅鮮奶吐司, 改用快速版.

今次用了高筋粉 280g, 牛油 10g, 糖24g, 奶粉6g, 鹽5g, 凍鮮奶 195ml, yeast 4.2g


快速mode 3, 要兩個半小時

今次出爐, 尙算成功


個麵包頂係圓嘅

我量過個包嘅高度有16cm

快速版整包時間縮短咗, 但麵粉要用多的, 酵母又要落多的. 但係整出嚟嘅包就矮過要整四個幾小時嘅包, 咁正如型爸所講, 每片麵包要食多的麵粉囉..

哈哈, 咁都要接受架.  星期六日整就可以用長的時間囉.

冰糖雪耳燉木瓜

October 24, 2013, Thursday night

為了條氣管, 前日燉橙, 昨天燉蘋果, 今天聽Akiramay講燉冰糖雪耳木瓜.  佢話通常佢咳, 食完一輪藥都唔得, 佢就會冰糖雪耳燉木瓜, 一星期燉兩次就得.


我落了兩粒中size冰糖

買了兩個中小size木瓜, 諗著一次燉兩個, 呢個熟的

呢個生的.

浸了一個雪耳

點知一切起上嚟, 一個已經好多, 咁留起生少少嗰個, 明天要嚟煲木瓜蘋果湯啦.

雪耳冰糖放底, 加入雪耳, 再加入木瓜

加滾水至剛蓋過木瓜.

set燉三個小時, 但通常燉兩個半小時就算, 唔想咁夜食呀!

燉好用匙羹拌勻

 

好味呀! 我呢款雪耳燉起仲係有的爽口, 好味呀!

 

川貝冰糖燉蘋果

October 23, 2013, Wednesday Night

昨晚燉橙, 真係覺得超難食, 今日食午飯時去超市買了蘋果, 今晚就可以整川貝燉蘋果啦.

用咗三個富士蘋果, 去皮去芯
 

先放一半蘋果入燉盅, 加三匙川貝粉, 兩粒冰糖
 

再放餘下的蘋果, 不需要加水
 

用電子燉盅set 了三小時, 但我只燉了兩個半小時, 不想太夜食呢.


燉好了.


只要用大匙攪拌一下, 的蘋果就變成蓉


二公子對呢的唔喜好, 咁我同型爸每人一大碗啦.

希望食咗對條氣管好的啦.

燉橙

October 22, 2013, Tuesday Night

下午趕回公司開會, 見完客放工都已經好夜, 本來想返屋企前去買蘋果燉川貝, 但走時好攰又唔想去,  見到公司個雪櫃有同事買咗幾個蘋果, 想攞咗先明天買番比同事, 諗諗吓又唔好, 不問自取是為賊也, 五號屋唔想做盜賊呀!

另一位同事同我講屋企有無橙呀, 燉橙都得架, 可以止咳.   咁橙又有喎, 同事約略講比我知, 咁我開車返屋企.   開緊車, 聽到有message, 原來同事寫下做法, whatsapp比我....我的同事真係好呀!

呢, 就係呢個message呀!

咁返屋企梗係整啦, 洗乾淨個橙, 在上面界十字, 掀開少少加了半茶匙鹽

隔水蒸20分鐘, 咁就用個鑊啦.

點知燉完個底一的水都無嘅, 啊, 應該唔好加蓋.   開蓋再蒸過

今次蒸完個鍋底有少少水啦


將的水倒入杯內, 得咁少咋.  飲咗佢, 嘩, 又鹹又澀, 好彩得一啖啫.

 

 咁用匙食的橙肉啦, 我呢款橙好多汁, 但食落去完全唔係食緊橙, 係似食緊橙入面白色嗰的衣, 非常苦澀. 好難食呀!

 

都勉強食咗佢, 真係好難頂呀!   食到打冷震呀!

我明天都係去買蘋果, 燉蘋果好的.

 

出呢篇時, 真係唔知將呢篇歸邊一類, 又唔係甜品, 又唔係小食, 更加唔係美味的東西.  結果將呢篇歸類去自家醬汁(燉咗有橙汁麻), 哈哈, 差的想開一個項目, "好難食的東西".