落雨天行山天 - 第二落雨路

January 3, 2016, Sunday

星期天, 行山天, 點知一起身就落雨, 組長話大家瞓吓添啦....

瞓到九點, 已經好醒但仲係落雨...但我心好痕呀!  真係好想出去行吓.

响群組話瞓醒啦....睇吓有無反應先....哈哈, 點知組長即覆...09:30出發...哈哈, 比多十分鐘得唔得呀!  都要梳洗架.   副組長又覆ok.

 09:38出發....睇吓的天氣....煙雨濛濛...Foggy.  唔緊要, 打傘都要行呀!  平時行行吓落雨都常有, 但明知落緊雨都要出發, 都係第一次.   一行六人, 三對couple出發.

組長話今日行去直昇機坪條路比較好的, 無山泥無石級, 落雨都唔會滑倒.   的雨唔係好大, 落下停下, 過一陣又綿綿密密.

例牌, 先去觀音廟/天后廟/龍王廟拜神, 再去恊天官拜關帝

同圍呢附近, 最乾淨就係呢個南涌公廁.  每次都响呢道去咗洗手間先.

 
睇見呢個路標, 係喎, 我地好耐都無行過新娘潭啦.

 
亦都唔記得, 行去直昇機坪尤德亭呢段路係衛奕信徑

 
亦都係八仙嶺郊野公園的一部份

 

 今日落雨慢慢行, 有時間recall吓行過的路線

响呢的地方, 都有個咁正泊車位, 有哂車牌號碼架. 

行到直昇機坪啦.

上到嚟, 好大霧呀!   無咩好做, 見組長把雨斜咁colorful, 大家响道影吓相先.

回程再經過恊天官, 咦! 好嘈好熱鬧呀!  今日唔知係咩野誕呢?

組長夫人話今日想食強記, 又好啫.

今日落雨無咩人, 的服務態度應該好的啩!

 

組長鍾意飲齋啡.今日杯奶茶唔錯喎,  上次沖到好似奶水咁.

  
今日的茶沖得好, 檸檬茶都好飲的.

真係在節慶呀!  有舞獅呀!

組長夫人話好耐無食過腸粉同燒賣.  呢道的腸粉都幾滑, 但係的燒賣好實, 唔好味呢!

嚟強記, 都係要食即食麵或米粉之類.   都ok架.

食完突然間醒起, 呢道嘅豆腐花幾好食....好飽又想食.  結果要了三碗, 每人食半碗啦.

行完食完都未到一點, 天氣繼續煙雨濛濛, 但行完山, 開心哂呀!