除夕倒數聚餐

December 31, 2015, Thursday

今晚除夕聚餐,都係以Potluck為主, 每人整一的, 咁做主家嘅就唔使咁辛苦啦.

自從我家多咗隻狗狗Whisky之後, 真係覺得屋企混亂好多, 呢排都好少叫的鄰居過嚟, Whisky太熱情, 唔係個個受得到, 佢鐘意撲埋去錫人, 又唔知自己好大隻, 撲親的小朋友都唔知點算.    所以每年在我家開的除夕聚餐, 今年改到八號屋舉行.

本來除夕倒數聚餐, 都係以西式為主, 但今年fusion菜, 整咩都無所謂.  我一早諗定整緬甸魚湯河, 因為Mrs. Kua話好想食(佢响Toronto 朋友屋企食過話好好味).   Mr & Mrs Kua遲的會移居外地, 咁我家中有緬甸姐姐, 咁就今日整比大家食啦.  如果好味, 可以在佢走之前, 再整多一餐.

今日倒數聚餐, 由五點幾六點鐘開始飲, 嘩, 飲六七個鐘, 所以大家都整多的小食用嚟送酒

我用咗三款黑毛豬火腿

切一個歐洲出的蜜瓜.  呢款蜜瓜食咗喉嚨唔會痕架.

我預備咗黑毛豬火腿, 芝士(哈哈, 隻星形碟同olive wood board 及小义子Boxing day嗰日都已經出過一次埸, 以後都要用多的, 不枉我從西班牙帶佢返嚟.

一開始時, 已經放咗三枝whisky出嚟, 左手邊Royal Lochnagar係主人家朋友送嘅, 中間Royal Salute21年係林老闆帶來, 而加手面嗰枝Glenfiddich 21年係我响Lisbon機場買的.   開始時只係型爸同林老闆飲Whisky, 女士們飲紅酒

另一個小食嚟啦, 係名貴的冰鎮鮑魚.   組長同組長夫人帶嚟架.   真係大件事, 組長唔鍾意Whisky, 佢要飲中國白酒, 男士開始飲茅台....今晚一家有人醉....

Mrs Kua 整嘅煙肉墨魚, 好惹味呀!  仲有的好健康嘅西芹紅蘿蔔條, 呢的係我地request, 因為呢兩樣, 食到最後都會繼續食.

主人家燒咗的英國香腸

仲有大量果仁同開心果....

食吓食吓, 大家都已經飽飽地....跟著我見唔對路, 再食牛仔骨加牛扒, 咁我的魚湯河點算.  第一時間, 拎我的緬甸魚湯河過嚟.



哈哈. 淨係賣相都唔錯啦!

 
大家一食之下....收到十幾個likes, 個個都話好味!  個個都添食呀!   雖有少少辣, Mrs Kua都話好好味...好開心呀!

林太整的粉什菜及麻醬手撕雞

Mrs Kua 的什菜沙律

主人家都馬上燒的兩寸牛仔骨出嚟.  但個個都飽啦, 每人食一小嚿啦.   至於的靚牛扒, 我地叫佢地唔好整啦.

睇吓我地今日的酒, 大部份都要四位數字, 最貴應係左手面第一枝响Decanter入面Mrs Kua帶嚟嘅紅酒Chateau Haut-Brion 2001.  呢道嘅酒, 最後只有右手面兩枝威士忌無開, 開埋真係唔得掂.  今晚即係開咗一枝威士忌, 四枝紅酒, 一枝茅台, 一枝御缸.

本來仲要開香檳倒數, 最後都取消了, 因為再溝的酒落去, 真係好多個都會醉.  型爸已經講野好大聲好大動作啦.

最後仲有主人家媽媽整的薑汁撞奶.

今晚好開心, 但我無忘記今日係大公子的生日, whatsapp過去比佢先, 當年今日係我的受難日呀!  當時都幾危險架, 最後母子平安, 而家都咁大個仔啦.

開心倒數.... 10 9 8 7 6 5 4 3 2 1 .....

Happy New Year!