January 15, 2016, Friday
忙咗兩個星期, 的客人卒之走哂啦. 的善後工作排山倒海, 不過都唔理啦, 的野係永遠做唔完, 緊張了兩個星期, 真係要透透氣. 今天返半日工, 下午請假去玩呀!
又去邊道玩, 哈哈, 同的鄰居去汕尾食海鮮呀! 年幾前去過一次, 今次趁Mr. & Mrs Kua 移居外地前, 我地再去一次. 食過番尋味, 食新鮮捕捉回來嘅海鮮呀!
約咗兩點半由家中出發, 一點鐘還在公司忙著, 一看時間, 馬上掉低手頭上的工作. 開車回家.
兩點返到屋企仲有時間食碗麵...(哈哈, 回定前打定電話叫Cindy煮架).
知先唔使咁趕啦, 林老闆三點先返到嚟, 改到三點半先出發.
今日天氣唔好, 我們出發時下著大雨, 但無減我地嘅興致呀!
由我地屋苑出發到深圳, 差不多四十五分鐘, 由深圳去汕尾, 兩個多小時, 加加埋埋, 去到汕尾要成三小時呀!
去到汕尾六點幾, 天都黑哂, 唔係第一時間去酒店check in, 而係去海邊豐勝海鮮餐廳食海鮮. 的路黑麻麻, 真係要林老闆咁熟路嘅先搵得到.
海花金古, 三刀, 响香港好難食到, 有都好貴呀! 點海鮮, 等型爸同林老闆啦. 不過我比咗的意見, 今晚食花金古啦.
Mrs. Kua 有咗一枝白酒, 一枝紅酒留番明晚, 林太帶了兩枝柚子酒. 天氣涼我帶了黃酒. 型爸佢地帶了Whisky, 但今晚只得三位女士, 哈哈, 咁多酒, 點飲呀! 睇嚟今晚都唔會飲黃酒啦. 飲一枝白酒就夠啦.
呢的送酒生曬小魚乾, 食吓食吓又幾好味喎.
上海鮮啦...
白焯海蝦, 呢道有兩款蝦, 好鮮甜呀!
白焯瀨尿蝦, 的肉好爽, 有蝦羔架.
白焯蜆
白焯花螺
呢款叫苦螺, 怕寒涼唔好食, 食幾隻就會痾架.
白焯走地雞
清炒菜心, 咁多樣, 就係覺得呢碟菜麻麻
海膽炒飯
什魚湯
呢條就係花金古啦.
其實我地只係六大一細, 但叫到成檯都係
除咗的雞, 其他全部食哂呀! 其實剛嚟到時, 個個都好肚餓, 咁大碟海膽炒飯都食哂. 食完個個都好滿足呀!
食完我地去酒店check in, 呢間酒店在汕尾黃金海岸, 叫顯達酒店, 新開咗幾個月咋.
大堂同裝修都幾靚
房間的裝修都唔錯架
間房頗大, 仲有個小偏廳.
在房間休閒了一陣, 我地約了九點鐘再出去, 哈哈哈, 我地要去食甜品呀!
林老闆帶咗我地去一條街, 整條街都係熟食小檔, 呢檔專賣甜品, 仲有菜茶呀!
要了芝麻糊加湯丸
白果腐竹加清比丸
綠豆加清心丸
呢碗就係菜茶, 上面嗰的係炸脆米
入面有好幾款菜,蝦米,臘腸,膿肉,花生....又幾好味喎!
最後encore再要多碗白果腐竹清心丸
另一碗再加湯丸.... 個個都食到好滿足
臨走都唔放過的油條炸餅, 不過呢兩樣就麻麻, 油條已經凍咗, 炸餅就太油膩.
呢道都有海鮮檔, 但呢的就唔敢食啦.
食完開車返酒店...哈哈, 個個食到飽飽, 今晚一定好好瞓.
家乡美食
回覆刪除