冬至

Dec 22, 2015, Tuesday night

冬至公司放下午四點, 但我今日唔趕著走呀!   因為今晚唔需要我煮, 咁可以輕輕鬆鬆, 食飯時間先去到奶奶屋企.


雖然唔煮啫, 我都有貢獻架, 就係一大盒大大粒醬油漬北海道三文魚子, 用紫菜包飯加的魚子...超美味又唔使煮呢!


姪仔一家就叫工人組組準備了斗蓮藕炆腩仔

今餐冬至飯, 有大伯大伯娘幫忙主理, 因為奶奶嗰邊個新工人姐姐, 煮的野真係唔係好掂.  無他, 我奶奶煮的野都唔係好掂, 點會教得好.  加上佢年紀大, 要佢攪餐十幾二十人食嘅晚飯, 都係難嘅.   所以我覺得最好係Potluck 形式, 每家煮一兩樣, 咁就大家都輕鬆的啦.

今日大伯大伯娘佢地整咗幾碟小菜, 再加一煲粉葛赤小豆鰂魚湯, 又濃又好味, 超正呀!  再加上奶奶又叫人整咗十碟八碟, 最終都係每款一開二, 二十幾碟.

其實食都係其次, 過節最緊要與家人相聚, 大家開開心心, 傾吓講吓已經好好啦.

的魚子飯好受歡迎, 哈哈, 平時唔食飯嘅都迫佢地食的啦.   不過我奶奶就唔鍾意啦, 佢唔鍾意的生冷野, 又話有腥味喎!   咁咩野都有人鍾意有人唔鍾意架啦.

姪媳婦今日由佢帶來及調較飲品

用桃汁整的意大利特飲 Bellini

餐後仲有生果餐, 呢款係歐洲蜜瓜, 用嚟配火腿就最啱.

餐後仲有冰酒呀!

姑奶佢地話要去我屋企, 佢地想12月31日去我屋企倒數, 但我地已經約咗鄰居啦, 12月25, 27, 29, 二公子已經book咗場, 咁我叫佢地可以的話12月26日嚟啦.  一呼百應, 哈哈, 嗰日又好唔得晴嘞, 但唔使驚, 我放假.

不過今日食得有點心不在焉, 我架車隨便泊咗喺樓下, 驚比人拖車呀!  我想泊入停車場, 但停車場滿哂無位.   個個都返阿媽屋企做冬, 停車場爆滿.

食完飲完, 今日要快的走, 落到去, 架車無被鎖及拖走, 真good luck 呢!