尖東華聲酒家

October 13, 2015, Tuesday

今天約咗舊秘書小姐出嚟食飯, 同佢慶祝生日, 同埋最緊要係帶埋BB女出嚟比我見吓.  舊秘書小姐話不如去韓國餐廳, 佢打電話訂位.  不過佢話打極都無人聽, 到時去到見啦.
 

結果我去到, 仲見到呢個牌, 但餐廳門口鎖著,  打電話去到仲有聲, 的廣告牌未移除, 好可能係久租關門, 又一間了捱唔著啦.    昨天先講久唔久要去幫襯的餐廳, 唔係消失咗都唔知, 今日又中一間.

跟著收到舊秘書小姐電話, 佢話唔好去古官啦(佢仲未知古官執咗), Toyo Mall 的樓梯好麻煩,  商埸入口無傷殘或BB車設施, 佢推著BB車上唔到, 現在一手抱B, 一手拖著摺起嘅BB車, 聽電話都無手....不如華聲酒家算啦....   哈哈, 當其時我已經坐扶手電梯落咗一層响華聲酒家門口, 即刻去另一邊接佢, 幫佢攞架BB車...湊B真係辛苦, 做媽媽的要三頭六臂.

坐低叫舊秘書小姐叫點心.   而我就忙於氹B女同我玩, 哈哈, 我見到佢就開心, 米芝蓮肥腿見到都肉緊呀!  真係想咬兩啖.

其實呢道有點心套餐, 但我地當時無留意, 求其點的啦.

有韮菜角

馬拉糕...呢碟可以比B女食

豆苗餃...呢碟的粉皮整得唔好, 一夾即爛....差.

叫咗個香麻核核包, 哈, 原來係麻蓉餡加咗的合桃, 又幾好味喎.

我不是春卷...都只不過係春卷


到咗豉油往雜菜河...食食吓....咁即咪齋河!

叫哂的點心先發覺可以叫一文一個义燒包, 咁抵, 唔叫點得...點都要叫兩個. 個包又幾好味...抵食呀!

 跟著仲叫咗個HK$8泰式鳳爪, 呢碟就唔得啦, 的鳳瓜未炆好, 好硬呀!


唔覺唔覺我地叫咗八樣野, 超過哂2.5嘅原則(請人食午餐, 叫五樣野實在太少啦), 結果食唔哂啦.

埋單HK$147, 我都覺得抵.  不過返嚟睇番的相, 見到八樣野加埋其實都只係HK$118, 原來有HK$29係茶芥加一, 佔24.6%... 去飲茶最唔抵就係呢樣啦....哈哈, 如果叫少咗兩款特價點心仲唔抵, 茶芥佔百份比更高.