中秋南涌尤德亭行山樂

September 27, 2015, Sunday

今日係中秋節, 但我地行山組無偷懶, 繼續去行山.   其實我地都係利用早上時間, 就算唔去行山, 都只係响屋企hea, 咁梗係出嚟行吓好的啦.

昨天下了幾場大雨, 今日唔行林徑, 行大部份都係石屎路嘅南涌, 經直昇機坪, 再去尤德亭

去到觀音廟, 見到對面山全部都係白色一點點, 呢的係小白鷺.   從未試過見到咁多小白鷺聚埋一齊.   如果唔出嚟行山, 點見到呢的景色!

每次見到呢的景色都心曠神怡.  真係要吸多幾啖新鮮空氣

去到觀音廟天后廟拜吓神, 跟著再落下面龍王廟, 今次先留意到可檯石櫈緊起於水面上, 如果打風落雨潮漲, 的水唔知會唔會浸過石櫈呢.   仲見到棵樹打橫向水面生, 唔係向上生呀! 

今日好熱, 早上八點幾已經29度, 仲話一陣會落雨, 我地要快的行啦.   不過經過關帝廟, 都入去裝柱香啦.

行咗半個鐘, 呢道算係真正起點.

天氣好熱, 又無咩風, 好快就成身出哂汗.  今日要考驗自己, 預備唔休息, 一口氣行到直昇機坪

 

我成功啦, 行的大斜坡真係好索氣, 以前要休息幾次, 今次有的位雖然行得好慢, 但總算係無休息, 一次過行哂呢段路.   日子有功, 心肺功能真係提升咗呀!

呢個八仙嶺郊野公園好大, 要行真係有好多地方可行呀!

响直昇機坪休息了幾分鐘, 我地繼續行, 先經過橋山橋, 再去尤德亭

呢道有溪澗, 但我地無行落去

行多十幾分鐘已經到尤德亭

上到嚟又影吓相啦.

睇完風景, 我地回程啦. 

睇睇錶, 我地又進步咗, 行咗大約一小時.  回程應該仲會快的.


哈哈, 不過天公做美, 全程無落雨呀.   下雨時間又延遲咗.

今日我地去沙頭角海景私房菜食午飯

我地嚟呢道食過幾次, 覺得以快餐嚟講, 呢道的野都算幾好食.

炸菜肉絲炆米, 唔錯.

組長同副組長分別要了餐蛋及餐腿麵, 呢道的即食麵用出前一丁, 麵質好的喎.

陶媽要了雪菜肉豬扒麵, 我要了炸菜豬扒米, 大家都覺得幾好味 (唔知係咪行完山肚餓)

叫飲品時真係好笑, ...凍檸茶少冰少甜, 多冰要甜. 凍奶茶少冰走甜....各有所好....但落單位小姐就要小心唔好攪錯.

平均每位HK$40就攪掂.