老友相聚年初五

February 12, 2016, Friday

今日的老友嚟我屋企拜年, 其中一位遠從加國回來, 年初九便走, 當然要聚一聚啦.

佢地好體貼, 十幾人食飯, 唔想我咁辛苦, 叫我唔好煮.   佢地話每年都係我煮, 顧著煮又唔可以大家坐响道傾謁.

跟著有三個方案:  1) 叫pizza...no no no.... 2) 出去酒樓食, no no no, 過年時間又貴又難搵位...3) 外賣小菜返屋企食啦....yeah yeah yeah.... 一致讚成!  

今日真係可以坐低飲杯茶, 傾吓謁啦.   不過唔煮飯啫, 佢地未嚟前我都係响道整整整, 邊有停過手.   火腿芝士

再整咗兩jar Sangria , 我落咗好多水果落去呀!  我地口水多, 好易口乾呀, 飲的低度數飲品再食埋的生果, 好清爽呀!

佢地話飯可以唔煮, 但呢個雞蛋脆皮椰汁年糕就真係唔可以唔整.  連佢地的仔女一嚟到, 都係話要食呢款年糕, 外面無得買嚟食架.

咁當然仲有我自家製嘅蘿蔔糕芋頭糕....嘻嘻, 又係一致好評呀!   成日讚到人鬆毛鬆翼, 想第二年唔整都唔得.

我打電話去知味小廚要咗一個辣雞煲同11款小菜, 約定七點半去攞.   佢地一攪掂打比我地, 即刻叫兩個壯男去攞啦.

知味小廚的野真係ok架, 食落就係唔覺有味精, 有飯有湯, 食完唔使洗, 乾手淨腳.

大家都食得好開心.   不過我個心其實有的唔安樂架, 朋友都只係一年嚟兩三次, 要人食外賣.  仲要掉咁多飯盒, 好唔環保呢!

佢地買定生日蛋糕, 同加國回來的朋友預祝生日.   咁啱另一個朋友兩個仔都係二月份生日, 一齊切蛋糕啦.

其實都真係好開心, 我地幾位老友, 睇著的小朋友出世, 而家個個都出哂嚟做事, 每年拜年, 的仔仔女女, 連女朋友男朋友都帶埋嚟.  真係好比面我呢倨aunt架!  所以唔整的佢地鍾意食嘅野點得吖.