雙牙唔係釀牙! 我去西班牙+葡萄牙呀!
晚上十一點半機, 哈哈, 一上飛機就已經係第一天啦!
上到飛機,即刻敷個蒸汽eye mask瞓覺, 瞓咗無幾耐, 大概點幾兩點吧, 空中服務員開始serve餐
不過又攰又眼瞓, 個肚又唔餓, 食咗少少就無食啦...(哼哼哼, 抵你一陣肚餓架)
Serve完餐, 全機熄燈, 全機人都一齊瞓覺. 坐响道瞓真係好辛苦，左轉唔得，右轉又唔得. 已經用咗頸泡, 都係瞓到頸攰腰痛. 飛咗八個鐘已經開始肚餓, 瞓吓坐吓又飛了共十一小時, 個肚越嚟越餓，做咩仲未到架, 又話有早餐.
早餐嚟啦....好肚餓, 覺得好好味呀!
導遊又話飛11小時，結果成13小時，卒之到蘇黎世，卒之落機， 但我地只有一小時轉機.
見到的名店都無時間行呀！回程轉機時間多的, 到時先行啦.
等安檢時連接機場wifi, 收到即時新聞巴黎發生恐怖襲擊，多處地方爆炸，怪不得安檢條龍咁長啦. 咁check得嚴密的都好嘅. 安檢時間長咗, 攪到我地要跑去閘口，仲有10分鐘就開機，好彩等埋我地咋，唔係要等幾小時坐下一班機，又唔知有無二十幾個位.
上到機大家都安樂哂，不過又要坐多兩個幾小時. 呢程飛機，有個包食，整杯咖啡醒一醒. 瑞士航空最貼心係臨落飛機前派朱古力，鍾意食攞多幾塊都得架.
由出發連轉機差不多二十四小時先到巴塞隆拿....坐長途機真係好辛苦.
上旅遊巴前有的時間, 在機場Vodafone買咗張網咭EUR15，覺得好抵, 有1.5G，可用時限九個月, 好開心啦, 個心仲諗, 好彩無响香港買的幾百文嘅網咭. 㸃知第二日的data就用哂，我地去到西班牙行街時, 去Vodafone問, 原來機場嗰個人無activate個plan, 嗰EUR15用kb計data,，唔知點解一日就無. 最終, 再比的EUR15, activate 個plan, 咁响西班牙就有得用啦.
一出機場就開始第一個行程:
參觀巴塞隆拿球場. 哈哈, 對的足球迷嚟講可能好開心, 但我地呢的就真係隨便睇吓. 如果要入去睇球場, 要另外買票 (又真係有人肯比錢去睇個吉球場)
球星相, poster, 仲有好多其他產品
參觀完, 我同姑奶先試吓西班牙的歐陸風情.
飲杯咖啡食個包, 享受一下歐洲的露天風情, 平時我唔喜歡坐戶外, 嫌多車多塵, 但呢道無車, 天氣又好, 咁就無所謂啦. 坐咗咁耐飛機, 享受半小時都係好嘅.
導遊都算貼心, 帶我們去食個早午飯
今天食中餐呀, 呢間餐原來係香港人開架.
哈哈, 估唔到嚟到巴塞隆拿, 第一天就去到香港人開的餐館
今天仲有煲湯飲,導遊話平時多數都係紫菜蛋花湯咋
食完飯, 我地跟著又去下一個景點啦.
沒有留言:
張貼留言