農曆年假回來, 忙咗兩個星期, 日日响公司都做到氣咳....哈哈, 其實好開心架, 因為最緊要忙, 唔忙先至驚呀!
今日開始又放幾天假(就係咁咪日日都咁忙囉).
今次好難得, 同三個哥哥嫂嫂, 三位姪女, 還有哥哥的兩對夫婦朋友, 一行十五人去韓國呀! (可惜三家姊今年無返香港過年, 如果唔係, 一定攪一次六兄弟姊妹去旅行).
今次由姪女做導遊兼領隊(佢好有壓力架, 又唔係做導遊, 未試過一次過帶咁多人去玩), 帶我地去首爾玩幾天. 本來無預我架, 因為兩年前已經跟佢去過一次, 佢最主要係帶幾位未去過嘅兄嫂. 佢地一早book咗機票酒店, 但我知道後梗係唔制, 型爸上次無同我一齊去, 今次一定要一齊去玩. 我同型爸另外訂了boo兩張機票, 去程我地早佢地一小時到, 回程就遲佢地幾小時先飛, 但同住一間酒店, 唔一齊坐飛機都無所謂啦.
我同型爸訂咗大韓航空, 下午12:35分出發, 在家09:30 就出發啦. 開車去機場都要45分鐘.
Check in之後就去40號閘口嘅Plaza Premium lounge食早餐
三個半小時嘅飛機, 睇咗套James Bond 就到啦.
好多人去韓國, 淨係過關, 都排咗大半個鐘.
佢地班機比我地遲一小時先到, 我地決定响機場等埋佢地先坐機場巴士.
我地download咗韓國機場app, 有1000won機場巴士優惠。但去買票時又話唔用得。後來我地上車時，同司機講，司機都唔知點回答。最終我地攞到優惠(因為姪女識韓語). 回程就一定攞唔到啦.
坐６００２號機場巴士(5號閘口)，由機埸去東大門，車程大約一小時２０分鐘。兩年我嚟過，仲記得响邊個站落車。
我地今次住呢間Mini Hotel Dalkom Dongdaemung, 落車之後，行幾分鐘就到，好方便呀！
迷你小梳妝檯，廁所就係all in one嗰種，沖涼用花灑。 我唔係好like呢的設計，一沖涼坐廁及整個洗手間都濕哂(不過沖沖吓就慣啦, 人嘅適應力好強嘅，最緊要係水壓夠)。 最好係房間嘅暖氣可以調，入到去４０度。又熱又焗，除衫都除唔切（戶外溫度-4, ）我將溫度調至25度，舒服哂。
整理吓的行理，我地馬上出發去食晚飯，已然晚上八點幾，大家好肚餓呀！
我地呢邊負責燒豬腩, 呢個網係燒豬腩專用. 另一邊就係燒牛肉. 佢地燒好拎過嚟, 我地燒好就拎過去. 顧著食都無走過去影相.
呢的生菜同泡菜都係任添任食. 好好味呀!
埋單大約每人HK$100, 真係超抵食, 姪女好介紹呀! 佢話佢次次帶的朋友嚟, 個個都話好味. 最緊要係將的燒豬腩燒哂的油出嚟, 咁就一的都唔肥膩.
可惜唔識韓文, 講唔出地址, 呢間餐廳又無漢字, 姪女話韓文就係東大門燒烤店.
買咗兩盒外賣
呢的就係同著一間酒店的好處. 好彩我無book另外一間咋.
食完快的休息, 其實今日都好攰.
沒有留言:
張貼留言