生蠔剌身海鮮餐

March 26, 2016, Saturday Night, 復活節假期

食完午餐, 型爸話想出去Ocean Three行吓 , 睇吓有咩好買.

哈哈, 無事出街小破財, 一出街就梗係破財.   買吓呢的買吓嗰的, 咁就兩千幾文......咁今次買又唔算好貴, 因為買了兩執A5鹿兒島和牛.   仲有連埋今晚嘅晚餐.  和牛就唔係今晚食.   今晚係免煮生蠔刺身海鮮餐呀. 

唔好以為免煮就好輕鬆呀!  食生野都要好多工夫同小心處理.

响Ocean Three, 試食價食咗四隻蠔, 每隻HK$10, 好抵食, 嗰款海水味重, 好鹹呀!   如果拎走就HK$14一隻, 我地唔買啦.    買咗另外三款, , 平均約三十幾文一隻, 拎返屋企開, 如果叫佢地開要收HK$5一隻, 唔使啦.

 

呢的開蠔嘅工作, 就由型爸來處型, 買到返嚟放入雪櫃, 臨食前先開, 咁樣比較新鮮又衛生.   而清洗嘅工作就由我嚟做.  用過濾水沖洗乾淨, 食時加的檸檬汁....新鮮又好味.

至於刺身, 我地買咗一大條油甘魚, 一返到屋企, 趁魚仲未解凍, 先切一半放入冰櫃留起, 今晚食一半就夠啦.


的魚仲係好冰硬, 全靠呢把韓國玫瑰刀, 真係好勁, 切落去不費吹灰之力

 

趁的魚仲硬, 先切好一片片, 跟著包好保鮮紙, 放入雪櫃慢慢解凍.  Ocean Three教我要逆紋來切, 咁樣的肉就唔會散. 今日唔係宴客, 自家食我隨便切, 哈哈, 切起唔係好靚呀!

 
睇吓的油甘魚幾肥美, 食時加上少許青芥末豉油....好味呀!

呢隻麵包蟹係咁多樣之中我覺得最差嘅, Ocean Three做promote, 可能推哂的廠底貨.  買完回家馬上連包裝浸水解凍.   隻蟹已熟, 打開後好細隻, 的羔亦唔飽滿.   唔滿意, 對的麵包蟹打哂折扣, 第日都唔買嚟食啦.

 

呢款馬糞海膽就好靚啦. 買時仲有加拿大海膽可以選擇, 但加拿大海膽得個大字, 味道無咁好呢!

呢盒三文魚子就唔係今日買, 之前响一田買的.  呢盒係最後一盒, 最近去已經見唔到有得賣.  一盒500g, 呢餐食三份一都夠啦.  又要處理得好好, 開盒先取三份一, 剩下的馬上放回冰櫃, 取出的用保鮮紙包好放入雪櫃慢慢解凍, 盡量不要室溫解凍, 好影有菌架.

全部準備好, 開餐啦....

本來型爸諗著買的壽司返嚟做主食, 我話唔使啦, 自己即時包咪得囉.

用韓國買回來嘅紙菜, 自製一口三文魚子紫菜飯. 即食即包, 鍾意多的飯少的飯自己揸主意

另一款一口馬糞海膽紫菜飯

跟著拎的韓國泡菜

再嚟多一款一口泡菜紫菜飯.

每樣食咗兩件, 想唔飽都唔得啦...   今餐好好味呀!