西貢北潭涌大浪西灣赤徑行山樂

Ｍarch 13, 2016, Sunday

今日超開心呀！講咗好去西貢，今日卒之成行啦。

聽組長講西貢嘅行山路段，全程都係石屎路無樹蔭，夏天暴曬驚我地呢班女士怕曬，所以冬天 行會好的。上星期預測今又有雨，組長話睇天做，微雨就無問題，大雨就唔好行啦。

我地早上八點半出門，天陰但無雨，一於出發。

哈哈，去到西貢就懷疑今日有無揀咗日子，人頭湧湧，仲有警車block咗北潭涌郊野公園對出停車場嘅入口。　原來今日有個大型野外function，多人到不得了。

泊唔到位，組長唯有兜咗去大網仔新村泊車, 呢道有的車位, 但都泊滿. 我地唯有等一陣, 的人食完早餐就走.  最後泊到車, 都穴係好開心。  呢道有架94號巴士去黃石碼頭。　泊低架車，組長call咗佢揸的士嘅朋友, 再叫多一架的士，載我地入北潭涌。

出發前我地先去洗手間，士多隔離有條石級樓梯去蛇頭村大網仔村，落十幾級就到洗手間，好方便，洗手間也行算乾淨。

我地一行七人，坐兩架的士(呢道係禁區，私家車不可駛入）入到去北潭涌西灣亭，落車之後，先真正開始我地行山旅程。　呢個時候都差不多十點了。

呢道有好多段路可以選擇，可以由呢道行番出去北潭涌郊野公園入口，亦都可以行出去西灣。

 我地選擇行出西灣，出到西灣再決定今日點行法。

 剛開始行已經下微微雨，正如組長所講，全部都係石屎地，只要小心的行, 無問題嘅.

 

煙雨濛濛，景色好靚呀！

 我地一路行不停影相...行吓停吓, 唔出嚟行點會見到呢的靚景

 連的路整到好靚. 使唔使呀, 一半石級一半斜路呀！沿路，有哂路標，一定唔會行錯。

上斜落斜，制新路線, 心情興奮，呢段行得寧舍快的。　不過我就嫌的路城市化咗，少了大自然林徑泥土嘅氣息(哼，人地起到條路咁靚仲嫌三嫌四）

 好快行到西灣村.   嚟到呢道, 我地決定繼續前行，唔返轉頭啦。 第一個茶座叫海浪茶座

 行出的嗰間叫海灣茶座

呢的不同品種仙人掌應該係呢間餐廳嘅標誌啩。　餐廳嘅主人好緊張，組長夫坐咗响石膊側面影相，即刻比佢喝著，叫佢小心唔好整斷的仙人掌刺。  咁都明嘅, 但咁大聲喝人就唔係咁好啦.

 

行出沙灘，又影吓相先啦。

 跟著我地繼續行

轉過一個山頭，下面就係西灣營地，可以見到有人在那邊紮營。　呢道就係大浪西灣啦。

 

營地呢邊有洗手間，仲有一個直昇機坪，但那直昇機坪比另一班行山客坐在那邊開餐，無謂影佢地啦。　嚟到呢道, 大家去去洗手間，見人地拎的野出嚟食, 我帶咗的韓國餅乾, 立即拎比大家補充吓。

 行過海灘，再轉上另一個山頭，在另一邊山頭影番過嚟，又係另一個景色。

 大浪西灣真係好大浪。

行過另一個山頭，呢道有個日晷（音：鬼）顯示太陽昇起的方位（利用太陽投射的影子来測定時刻的裝置).  咁梗係停低影張相啦。

 初時都無留意呢的路標，唔記得由M幾開始行。

 

每行上一個山頭都有不同嘅景色

 

呢段路有好多吊鐘花，好靚呀! 呢邊山頭有好多呀!

我地遇到一對夫婦，帶著孫女一齊行，小孫女只有6-8歲吧.  但小小年紀, 已有幾年行山經驗, 都是爺爺奶奶訓練出來吧.  那對夫婦沿路介紹的植物給小孫女, 還擇了些一粒粒酸梅給小孫女吃. 來吃。 很好的自然教育, 我走過去問了才知這是酸梅, 還吃了幾粒呢!

 行過大浪西灣落到鹹田，呢道有求救電話

行過沙灘，再行過獨木橋就到鹹田

 一過橋就係海風士多。已經是下午十二點四十分，我地停下來在這裡食午飯，補充吓體力

 要了薑蛋炒飯HK$65，星洲炒米HK$65

 椒鹽鮮魷HK$98, 炒菜

牛肉炒烏冬HK$65, 每人一杯飲品(飲品十幾文一杯啦)。　真係估唔到，每碟炒粉麵飯都好好味.  埋單HK$463, 每人都只係六十幾文。

 我地有甜品食呀。今日預咗行長程，帶咗朱古力比大家補充體力。 而家就用嚟做甜品啦.

食完坐一陣, 我地又再出發... 

行咁多段, 呢段路係最辛苦, 不斷行斜路向上, 真係行到喘哂氣, 行斜路係我最大弱點, 馬上變做蝸牛小姐.

中途有介紹大浪灣及鹹田. 

我地向北潭凹方向行

經過大浪村(大圍)

    興記士多

呢道左轉右轉, 但只要看著路牌, 向北潭凹方向就可以.

食午飯時, 我地問咗士多老闆, 只要行到M042, 向右轉落樓梯就可以去到赤徑.  我地都唔知每一個M係幾遠, 會唔會係一M一公里呢?

又經過蚺蛇尖 (蚺音:南), 我地無行上去呀!   睇網上資料蚺蛇尖，位於西貢的東北。雖只高468米，山形獨特,山勢險要，被譽為「香港第一險峰」，因而吸引不少行山者慕名一遊。  

今次唔行, 或者有機會再來行一次.

睇著路標, M040, M041.....就到啦.

到M042啦....

向右望, 真係有條路, 拾級而下....都唔記得行咗幾多級樓梯....總之一路行啦.  去到一分义路, 見到有一個紅色路牌, 上面寫著香港青年旅舍恊會, YHA白普理堂(赤徑), 我地上網查, 碼頭就在這一邊. 我地要去碼頭搭船呀!  兩點二十分有一班船, 現在兩點, 有足夠時間

當我地行到一半, 哈哈, 見到那對帶著孫女的夫婦, 我地問佢地點解行出嚟, 原來佢地在碼頭等了很久, 唔知幾時有船, 諗著行番出去.   我地話佢知我地查過, 呢道一小時一班船, 可能佢地嚟到時那班船剛走.  佢地知道二十分鐘後有船, 又跟我地行去碼頭.

呢道就係赤徑碼頭啦.

對著碼頭, 有個休息亭, 比的等船嘅客人坐

行到碼頭, 有時間表. 呢道寫著每位HK$12. 但應該係舊價錢.

有一隻船使迎碼頭, 接走咗一班唔知係韓國定日本行山客.  有的街渡叫我地上船, HK$20一位去黃石碼頭, 唔制啦, 坐大船安全的

我地要坐的渡海小輪到啦...

每位HK$15

十幾二十分鐘就到黃石碼頭, 黃石美文譯做Wong Shek, 唔係Yellow Rock呀!

睇番航道, 我地响赤徑碼頭, 兜咗半個圈(東心淇咀)到黃可碼頭.

由黃石碼頭, 組長的士朋友只有一架車, call 唔到另一架, 咁五位女士坐的士, 男士就坐巴士.

出到去北潭涌, 仲係好多人, 大把人爭的士坐...我地穴係好彩啦.

去到大網仔村, 因為要得等三位男士, 咁我地去有行士多飲下午茶...呢道的野食唔得呀, 唔介紹啦.

架巴士到啦..睇吓幾迫, 三位男士落車啦.  辛苦哂.

大家坐低飲杯野...四點先開車返屋企....

今日行咗一整天, 行得好開心呀!

組長星期三要出差兩星期, 我地下星期日又要去拜山, 可能要隔一至兩個星期行山組先再出動, 所以今日動多的, 大家都好高興.