2016 韓國首爾之旅 - Day 2

February 25, 2016, Thursday

昨晚瞓得好好呀!  間房雖然細, 但張床好舒服, 可能昨天好攰啦, 一覺瞓到大天光.

我地今天十點出發, 大約九點出去餐廳食早餐.....哈哈, 呢間酒店真可愛呀!  講到明包早餐, 但係唔煮比你食, 要食, 自己煮啦.

呢樣野攪到我地的時間失哂預算, 因為大家都咁上下時間, 諗著出到餐廳有得食.

 

呢! 呢個就係個小廚房, 只有一個電爐頭及電煎pan, 即係話同一時間, 只有一個人可以用.  麵包自己放入多士爐.  早餐嘅選擇係, 蛋, 麵包, 果醬, 花生醬, 奶, 果汁, 咖啡, 全部自己動手整.  洗碗洗杯洗碟都要自己嚟.

每一對couple負責自己嘅早餐, 哈哈, 好開心呀!  型爸第一次煎蛋比我食, 我就負責烘多士搽麵包.  好忙唔得閒影相.   簡單的早餐, 都食得好飽.

食完先返房間換妄服, 好似响屋企咁

 

我地今日去outlet, 姪女帶我們去坐巴士, 271號, 但去邊我就真係唔知, 巴士站全部都係韓文.

因為係week day, 早上十點幾, 巴士上人不多, 我地包咗半架車, 坐咗大約半小時, 落車, 再轉另一架巴士.

呢架車係2200號, 呢道係總站.   上車後坐二十幾分鐘就到outlet

我地坐成個鐘, 就係去波州呢間Paju Premium Outlets.  兩年前我都嚟過.

去到outlet, 全部分開行, 想買咩就貫咩.  訂咗下午四點半在information 集合一齊離開.

我同型爸行吓買吓, 今次我無收獲, 但型爸就買咗一年好靚嘅皮褸.

 

行到成兩點先去Outlet嘅food court 食lunch.   哈哈, 買野時就見唔到, 但嚟到food court就見到三個哥哥.    我要了豆腐海鮮飯, 型爸要了牛肋肉湯飯, 好肚餓覺得好好味呀!   價錢仲一的都唔貴, 15,000won兩份餐, 即HK$95兩份餐.   韓元匯率低, 咩都覺得抵.

個個都有收獲, 一齊搭車返首爾食晚飯.

我地坐巴士經過海邊, 姪女話望過去嗰邊就係北韓....即刻令我諗起本是同根生, 相煎何太急.

我地坐車出到去宏大, 都差不多六點. 我地人多, 姪女話早的食飯好的, 驚搵唔到位呀!

經過見到炸雞啤酒...唔, 我地今日唔係食呢的

見到的街邊檔都好想食, 但姪女話千祁唔好食著呀, 唔係一陣食唔落.

呢, 我地今晚就係食呢間

咁就睇得清楚的, 我地食美肌豬手, 講都唔信, 佢地話係低脂豬手呀!

餐牌好簡單, 呢道主要係食豬手, 只係有不同嘅口味.

我地十五個人唔可以坐埋一檯, 結果分開三檯, 一檯四位, 一檯五位, 一檯六位.

每檯都有呢個煲, 係要嚟煮喬麥麵, 湯底都幾辣架.

姪女幫我地揸主意, 要了一客蒜蓉豬手, 我地呢檯6個人, 再叫多一客辣豬手

 

每份餐都跟一客沙律, 好好味呀!   的蒜蓉豬手一的都唔肥膩, 好味喎.

而辣豬手跟芝士鍋就更惹味...好味呀!

 
 的喬麥麵太好味, 再叫多兩客

大家食得開心, 好滿足呢!

食完我地仲節目...哈哈, 今日係shopping day.   早上去Outlet Mall shopping, 晚上去supermarket shopping.

由宏大坐地鐵去安國站, 有姪女帶著, 我地唔使用腦, 跟著行就得.

呢個supermarket 上次都嚟過.

呢個筲箕好大個呀, 的韓國阿朱媽用嚟整泡菜.   個煲放咗落去就知有幾大.   好平喎, 4,950won, 大約HK$30, 平呀!   睇吓啫, 唔會買啦.

我地今日買得好勁呀!  個個都兩三四袋, 滿載而歸, 姪女叫我地放哂的野响地上比佢影張相...勁呀! 

由朝行到晚, 勁攰, 今日一定好瞓!