EastSide Set Lunch

March 9, 2016, Wednesday

今日有人請食晏呀!  麻煩鬼卒之忍唔著, 爆咗幾個月前同人夾份中咗六合彩三獎...哈, 開心事都唔早的講我地知, 今日佢自動自覺請我地食午飯.   佢話好想去食個沙律Buffet.

點知去到, 原來已經無咗salad buffet, 改為set lunch.   咁又係嘅, 整salad buffet嘅food cost, 可能貴的, 仲有損耗.  現在最平嘅Set lunch 係HK$68, 好似平咗的, 但我地就非常失望啦.

無salad buffet, 都揀ceasar salad唔要餐湯.  但碟沙律送到嚟, 我同麻煩鬼你眼望我眼, 好失望, 得一款幾條菜.   佢話下次再嚟的話就改叫餐湯.

今日個廚師都唔知做咩鬼, 只得兩三檯客人, 我地等咗超過半小時, 的野都未嚟.  催咗兩次, 卒之嚟啦.

焗燶了面的夏威夷Pizza  HK$78

Fish & chips, HK$128, 貴呀！

水牛雞肉三文治 HK$68，個水牛雞整得幾好味，但個法包就韌到用刀都差的切唔開。其實呢樣野好易解決，廚師只要將麵包先烘脆便可以。

咁我地三個share嚟食又幾開心嘅！

甜品檸檬cheese cake, 每人仲有餐飲一杯。

今日麻煩鬼請客，每位唔使一百文。

我諗餐廳主人本來希望有所改變會多的客人，但見到只有三兩檯客，似乎變革唔成功，仲少咗人。　睇嚟仲要變呀，唔係以前儲落的客走哂就敝啦。