香草焗雞

May 20, 2016, Friday night

明天星期六, 又約咗的雀友....哼哼哼, 自從訂咗個電動麻雀機返嚟, 攪到自己好唔得閒添.

的雀友叫我唔使張羅, 隨便叫外賣咪得囉, 小菜或pizza都無問題.

但型爸出咗差, 明天先返, 唔想佢返到嚟仲要為我地張羅.   都係由我準備好的啦!  我又整大龍鳳呀!

今日預備隻"鳳"先.

用隻碗, 先落半湯匙海鹽, 加胡椒粉, 加黑胡椒

加兩湯匙香草, 加兩湯匙橄欖油.   其實調味嘅野, 都係靠估, 咁上下就得啦.  覺得唔夠就加多的啦.

我買咗隻大火雞, 將的香草鹽幫隻雞內外massage, 跟著放人雪櫃醃一晚.

其實焗雞就真係好簡單, 只要醃好, 第二日放入焗爐, 一焗就得.

第二天, 我在焗盤底加了一個洋蔥, 兩條紅蘿蔔(切丁), 一個蒜頭 (去衣, 原粒)

預熱焗爐220度

先焗雞背25分鐘

跟著攞出嚟

將隻雞返轉, 睇吓, 呢邊係全生架.

再放入焗爐, 焗35分鐘, 夠鐘時, 用木筷子試吓插入雞腿肉, ok, 熟哂.
　

睇吓幾靚.  一個鐘ok呀!  再焗得耐, 的雞肉就會好嚡架!

至於呢的汁, 係焗雞時焗盤底的雞汁精華, 我將的汁倒出嚟, 去咗上面的油, 跟著再加的海鹽胡椒粉調味.  如好多的話, 仲可以用煲仔煮濃佢做醬汁咁, 真係原汁原味呀!