雀局大餐

May 21, 2016, Saturday

開餐啦....  今日比咗好多驚喜的雀友呀!

對型爸都有驚喜啦, 佢出差幾天先返嚟, 都想佢食好的啦.  (嘻嘻, 都唔係煮咩好野, 只係同平時嘅菜魚肉不同啫)

打雀局都有西餐食, 的雀友係咪好開心呢!

栗米雞蓉蘑菇湯(礶頭湯), 配牛油蒜蓉法包.  我的蒜蓉包係用生蒜, 味道好好架.

奶油焗薯仔, 呢碟真係好剎食, 個個都話好味.  但真係好膩, 個個食完又想再食少少, 但又食唔落...哈哈, 攞你命三千.

蒜蓉西蘭花南瓜.  完全無難度, 只係分開炒, 放得靚靚.  的南瓜甜, 西蘭花少許爽, 好味!

鮮檸檬焗三文魚, 呢碟好清新.

香草焗雞, 平時都會cut開隻雞嚟焗, 但今日請朋友食飯, 原隻上靚的, 食時用刀界的肉出嚟, 開心的呀!

香蒜肉碎意粉,  今日刻意整個無汁意粉, 因為有雞蓉蘑菇湯及奶油薯仔.

呢餐係咪好豐富呢!!  佢地話好好味!  但食剩好多呀!

食剩唔係因為唔好味, 佢地話飲完湯食咗三塊蒜蓉包都已經飽飽地(哈哈, 都叫佢地唔好食咁多塊啦, 我都只係食兩塊).  跟著每人食少少奶油薯仔, 少少意粉, 少少魚, 少少菜, 個個都捧著個肚啦(哼哼, 等你地食飽的一陣唔好好食糊啦.

最大罪魁禍首係二公子, 預埋佢同女朋友, 突然間唔返嚟食飯,

而美味嘅意大利奶凍甜品, 都要兩個鐘後先食得落呀!

今日打牌無咩上落呀! 但佢地抽水後係都要分的籌碼比我, 話要幫補的飯錢....哈哈, 本來抽水嘅目的係要贏嘅贏少的, 輸嘅又輸少的.  咁我分多咗咪唔使做輸家, 又好啦.