譚仔三哥

June 10, 2016, Friday

今日睇免費報紙, 譚仔三哥又見報. 今日遲咗先出去食晏, 麻煩鬼話不如去幫襯譚仔三哥, 咁又好啫.

好耐無幫襯佢啦....  唔係的野唔好食, 只係佢太好生意,  一張六人小圓檯, 佢的伙計塞八個人落去坐, 迫到咁點食.   要我坐得咁辛苦, 寧願唔食.

今日遲咗去, 去到即刻有位, 六個人坐張檯, 合理的, 唔使迫.

咦, 又有新口味喎...砂砂湯米線....都係唔試著, 睇吓的口碑先.

我都係簡簡單單, 要咗碗清湯牛肉, 麻煩鬼話的牛肉睇落好靚.   我食落, 又真係幾好喎,好軟腍,唔似譚仔的有筋及無咩味.  個清湯底幾好味.

麻煩鬼要了雞肉木耳糊辣.   一送到嚟, 佢叫我試吓個湯底 (哈哈, 佢當我係食神) 雖然要了小辣, 但都幾辣, 味道唔錯呀!

我地兩個都覺得譚仔三哥比譚仔好味的, 都係咁講啦, 如果要八個人迫一張圓檯, 我寧願唔食囉.  去譚仔坐方檯, 一個位就係一個位, 無得係咁插入坐多一個.

辛苦搵嚟自在食,  都係嗰句, 要我迫著坐响道同幾個三九唔識七嘅人一齊貢個頭食米線, 咪攪囉.