青瓜芒果蟹肉米紙捲

June 9, 2016, Thursday  端午節

今日端午節, Cindy 放假, 但我要整幾味返奶奶屋企過節.

姑奶話食工人姊姊煮的野食到厭(好難食), 今次叫姐姐唔好煮, 淨係叫佢煲湯, 奶奶買燒肉雞, 其他的我地每人整兩樣帶返去.   咁都好嘅, 我讚成, 一屋二十幾人食飯, 一個人煮真係好辛苦.

大伯嬏母姪仔姪女都講咗整咩, 好多肉類, 咁我就諗的蔬菜類平衡一下.

今日試做一個青瓜芒果蟹肉米紙捲.

買咗幾個好靚嘅芒果, 去皮切的芒果肉出嚟

用呢款米紙春捲皮

重本, 用呢款礶頭蟹肉, 一礶好多, 用一半應該夠啦

用的沙律醬同蟹肉撈均

青瓜一大條, 切成幼條....咁所有配料齊啦.

預備一個碟, 加入凍滾水

用嚟浸的米紙春卷皮, 一浸十幾秒就會變軟就好快的拎起

放响碟就可以包啦.

每次浸一張, 包緊時就浸另一張.  我第一次放了兩張, 就攪成咁, 所以唔好心急.

先放青瓜, 再加芒果, 再加蟹肉....包包包....

的米紙濕咗之後好易黐, 包我一層要用保鮮紙分隔, 包哂的料, 包咗二十一條.....哈哈, 每人一條, 應該夠食啩.  包好放入雪櫃, 等我快的整埋其他餸先.

今日時間有的緊迫, 我覺得包得唔靚, 下次要包好的.