忍心

September 1, 2015, Tuesday

自從屋企多咗隻Whisky, 攪到屋企翻天覆地, 我同型爸都覺得好攰.

屋企有一個小朋友同兩個小朋友係完全唔一樣.  原來屋企有一隻狗同有兩隻狗亦都係完全唔一樣.

呢隻Whisky 幾個月大, 咩都唔識, 超級百厭星, 超活躍.   我同型爸比佢攪到無得瞓, 半夜起身周圍便便, 跟著仲行來行去, 最敝佢半夜嘈醒我, 我無法再入睡.

佢周圍便便不特止, 仲唔識死, 挑戰Loki大佬呢個地位.  坐Loki最喜歡的位置, 睡Loki的床, 攪到Loki大動干火, 咬咗佢大大啖好痛(好彩無見血), 佢先識嗚嗚嗚驚驚地.  但轉個頭佢又嚟過.

Loki最忍受唔到型爸攬著佢時, 隻Whisky又要型爸攬.   Loki即刻呷醋"糊"佢, 我地要不時維持秩序.

以前Loki返嚟, 佢個肚唔舒服, 只係在室內便便過一次, 我地放張墊在室外, 教佢一兩次佢就識.  但呢隻Whisky, 用咗好多方法, 佢都唔肯在戶外便便.   真係攪到我同型爸頭都痕埋.

Whisky年幼無知, 咩都唔識, 雖然頑皮, 但都唔怪得佢, 只怪我同型爸唔識教.  狗不教, 主人之過.


為咗教好Whisky, 我同型爸馬上報名去上堂, 但九月先開班, 呢段時間咁點算呢!

捱咗一個星期, 再係咁落去真係攪唔掂, 唔可以比Whisky仔擾亂哂我地一家嘅生活秩序.  唔可以再比佢在室內便便, 要佢守秩序....我地上網睇資料, 唯有忍心教好佢.

1) 我地縮窄佢嘅生活範圍, 不可以上樓, 只可在樓下大廳及室外玩耍;
2) 每食完一餐, 馬上綁佢出戶外, 要佢便便完畢, 才可入屋 (真係要好忍心, 佢自由慣咗, 突然綁佢, 佢係咁嘈).  平時食完三十分鐘以內, 大小二便都做埋, 點知第一次綁佢出去, 兩小時都唔肯痾, 心軟一放佢, 入屋就即痾.    第二餐食完, 今次硬著心腸, 唔痾就唔準入屋, 最後佢一小時內卒之肯在外便便
3) 要佢在樓下睡覺, 廚房有道活門, 佢可以自由出入.   本來覺得對佢係一件難事, 點知第一晚, 佢竟然無吠無嘈, 安靜地在廚房睡覺(第一晚我都好掛心, 偷偷落去睇佢).   晚上自己由廚房出外便便.   雖然仍不肯痾在地墊上, 但已經踏出第一步.

真係想不到, 只是勵行兩天, Whisky 仔已經不再在室內大少二便.  我們仍不敢鬆懈心軟, 繼續用呢個方法, 希望幫佢養成習慣.

日間, 兩隻野玩得好開心, 玩到攰就一齊瞓.

佢地瞓著覺就係最寧靜嘅時刻.

幾溫馨!  型爸就係想咁, 多一隻陪Loki玩囉.