乾炒三蔥黑椒牛肉意粉

September 3, 2015, Thursday night

今日抗戰勝利七十周年特別假期, 無安排咩野節目, 都係响屋企hea吓.

早上同型爸一齊帶兩隻狗出去行吓.   第一個星期無帶Whisky一齊出去, 怕佢BB狗未打齊針唔好出咁多街.   點知型爸嗰日心軟, 一次過帶哂兩隻一齊出去....Whisky出過一次街之後, 見型爸拎起條帶要帶Loki哥哥出街, 佢就嘈到拆天, 一定要跟著去...唉, 而家想唔兩隻一齊帶出街都唔得啦.    早上帶佢地出去一次, 黃昏又帶佢地一次, 出完去, 兩隻條氣當堂順哂.

今日二公子咁啱又放假, 約咗的朋友返嚟捉棋.  初先又話晚餐會叫外賣, 叫我地唔使理佢地.  咁唔理就唔理.  好彩無預佢地, 跟著又話一齊出街食.

只有我同型爸兩人, 突然好想食黑椒牛肉炒意粉, 咁叫Cindy唔好煮飯啦.

 
點知屋企無肥牛, 哈哈, 但我有牛扒呀!   上次去Cycon買咗Black Angus, 用一嚿切片嚟炒咪得囉.

Black Angus, 咁樣食嘥唔嘥的呀?   哈哈, 都係咁食落肚.   切片, 豉油糖豆粉醃咗佢.  跟著落鑊炒至七成熟, 盛起備用.

預備咗三蔥, 洋蔥, 大蔥同乾蔥頭


意粉煮6分鐘再焗8分鐘, 瀝乾水份

仲有非常重要的黑胡椒

Cindy用張廚紙包著的黑椒用個鬆肉占搥係咁揼, 吓, 你唔好揼爛我個檯面呀.

即刻要佢攞個搥盅出嚟, 咁樣先至係加麻.

爆香黑椒, 爆香三蔥, 加入意粉, 加入調味, 炒炒炒炒

攪掂

的牛肉真係有的嘥, 炒完的black angus好似粗糙咗的.

嘻嘻, 嫌的黑椒唔夠辣, 可以醮的大孖勁辣椒醬就更惹味.

不過型爸話佢覺得冠益華記嘅桂林辣椒醬好似香的辣的呀!