重慶火鍋

September 5, 2015, Saturday

今日忙忙碌碌出出咗去一日, 走完粉買完餸去完超市, 一上車型爸就問今晚食火鍋好唔好....哼, 買野前唔問, 到買完返屋企先嚟問, 想點啫..... 咁遲先出聲, 屋企無咩火鍋料喎...哈, 型爸話屋企總會有嘅....咁好啦, 屋企有咩就食咩啦.... 

其實今晚食火鍋都好, 一陣返到屋企仲要做包裝女工, 咁食火鍋就唔使諗煮咩野餸.   摷個雪櫃, 拎哂的野出嚟解凍就得.

哈哈哈哈, 真係比型爸講中....仲有最後一包重慶火鍋湯料......今日就嚟個重慶火鍋啦.  配料唔多, 但都有脆肉鯇, 腐皮, 中蝦, 手切牛肉, 馬鮫魚肉蛋, 牛肉餅.   應該夠食啦.


個重慶火鍋湯底滾起好香呀....的蒸氣攪到個鏡頭檬哂添.

其他配料食辣唔緊要, 但係菜我唔鍾意食辣.   的白菜同菜心苗, 先焯熟, 隨時可食, 凍了就放入湯底快撈, 咁就唔會太辣.

其實一家唔會唔夠, 煮個韓國拉麵就一定夠.

的拉麵用重慶火鍋湯料煮完好入味呀!  

今日飲品, 蜂蜜雪梨菜, 二公子的朋友上次嚟時買嘅, 估唔到又幾好飲喎.  最緊要唔係好甜.  平時買慣檸檬茶, 下次可以多個選擇.

求求其又攪掂一餐.  兩仔爺真係好易攪掂, 食火鍋就無投訴.