I-Cafe - 尖東半島中心

September 10, 2015, Thursday

今日星期四專誠打去比Akiramay, 約佢去半島中心I-cafe 食重量級魚柳漢堡, 我真係覺得呢道嘅炸魚柳好食(我本身唔鍾意食炸皮), 如果加埋的炸薯條, 就係美味的Fish & Chip.  

早幾分鐘出門口去搵位, 平時好多人, 有時要得十幾二十分鐘.   點知今日去到就有位.

坐低睇餐牌, 吓, 點解今日無咗重量級魚柳漢堡呀!   佢地轉咗餐牌好失望呀!  通常我隔一個星期就嚟食吓, 食一半, 打包一半, 好開心架!　唉, 唔知第日仲會唔會轉番個menu呢?　今日少咗咁多客，唔知同轉咗餐牌有無關？　

咁嚟到都照食啦.   同Akiramay商量, 決家要B & C share 嚟食。

 我地都要鮮果沙律，唔要薯角

 南瓜忌廉湯, Akiramay話的南瓜湯整得幾好飲。咁又真係喎，比起文華中心的Pub煮嘅餐湯好似糊仔咁，呢道好好多。

 Ｃ餐什錦海鮮酥皮盒配牛油妞紋包，陳醋沙律。個餐包柔軟好味，咁大塊鮮牛油梗好味啦。

 至於個酥皮盒就一般啦，白汁蝦仁魷魚做餡料。　的酥皮都鬆脆。

Ｂ餐麥西哥檸檬薄荷羊肉卷。配牛角包，陳醋蔬菜沙律。 賣相都唔錯，不過個羊肉捲味道一般，入面加了太多青瓜絲，一的都無麥西哥口味。

每人仲有一杯特飲，洛神花茶。

今日係有的失望架，食唔到我覺得好好味嘅重量級魚柳包。　但呢道嘅食物，overall嚟講都算唔錯。　Ｂ餐HK$58，Ｃ餐HK$52，　加埋都只係HK$110。 唔使加一，平均HK$55一位。
咁嘅價錢有咁嘅質數，好過好多茶餐廳同cafe，所以一個星期或隔一個星期都會嚟幫襯一次。

久唔久經過，我都要睇吓佢地嘅menu, 重量級魚柳漢堡(以前逢星期四), 仲會唔會出現呀！