再戰甲龍 + 農埸鮮奶

August 23, 2015, Sunday

好耐都未湊過BB啦, 拎咗隻小狗返嚟, 真係同湊B一樣.   4個月大嘅狗仔, 咩都唔識, 好奇同圍貢, 叫極都唔聽, 仲周圍痾, 真係頭痕呀!
 
唔養隻細狗, 都唔知Loki咁乖.   Loki一返嚟已經識出戶外尿尿便便, 一教就識, 未被遺棄前可能已經受過訓練, 我地叫佢比hand, sit, lay 都已經識, 雖然一樣有頑皮之時, 但一叫就停.

但呢隻Baby Whisky 上落樓梯都未識,  零晨三點幾仲周圍走, 攪到型爸無得瞓.   為咗要湊呢隻B, 又驚我地唔响屋企, 唔知Loki會唔會咬佢, 型爸唯有放棄早上行山, 但佢叫我, 只係佢一個留守屋企睇著兩隻狗.

所以, 今日行山, 我單拖出馬...嘻嘻, 仲唔止呢, 我今日仲做埋領隊, 帶組長夫婦同副組長夫婦去行甲龍林徑/古道.

上次行甲龍, 只有陶媽跟佢爸爸, 我同型爸二公子, 一共五人探路.   而連續兩星期我地都已經行咗大埔滘林徑紅+藍, 大家都有的悶, 咁我提議不如行甲龍, 大家即和議話好.   今日陶媽有事不能出席一咁就我做領隊啦.

我們開車去到農場鮮奶, 在附近搵位泊車

對面已經係甲龍林徑入口


我都唔記得上次行咗幾耐, 話比佢地聽上大約一小時, 落又係一小時.... 哈哈, 其實唔係架, 上應該要1小時45分鐘, 落山就1小時左右啦.

沿路久不久都見到的越野單車手, 我地真係覺得佢地玩得有的危險, 好幾段路都十分陡峭, 加上的路面不平, 好易跌倒.   但年輕人可能都想追求刺激吧.

行到呢個有標示嘅分义口, 已經行咗1小時15分鐘

而我地只係行咗紅點路五分之四,  再行多十多二十分鐘, 先到甲龍古道交匯處.

 到啦到啦, 佢地第一次行呢條徑, 要影吓相

 落山嘅甲龍古道一的都唔影行, 好多青苔, 大家都要小心.  我上次第一次拗柴, 就係行呢條古道落.

經過工個水澗及小瀑布, 一個小時多的就落到山腳啦.

我地仲要行10分鐘, 先去到農場鮮奶.   哈哈, 唔使諗都係帶佢地嚟呢道食.

餐蛋麵, 佢地話好足料, 的餐肉夠厚, 的麵質都靚.

  
我同組長夫人要了雪菜肉絲撈烏冬, 好味呀!

  
副組長要了五香肉丁麵, 的五香肉丁都算多.

麵加飲品HK$354

其實食完麵飲完野都好飽, 但大家都想試吓的燉奶

咁要了芒果布丁, 薑汁燉奶

仲有燉奶, 每兩人share 嚟食.  大家試吓.

埋單平均每人都係hk$50左右....抵食過榮昌好多啦.

佢地話下次再行, 可能由古道上, 林徑落...哈哈, 無所謂, 都係咁行啫.

食緊野我已經掛著型爸.  返到屋企當沖完涼休息時, 型爸都話頂唔著好眼瞓, 佢昨晚比小狗攪到無覺好瞓, 要嚟個午睡先得啦.