Turkuaz 土耳其餐廳

September 2, 2015, Wednesday

一到下雨天, 尖東周圍附近的餐廳寧舍多人, 個個都同一心態, 落雨唔好行咁遠食晏, 附近求其搵間食就算啦.

先去海鮮站, 見排長龍就走, 上到去傷心酸辣粉又要排隊.  對面嗰間餐廳又啱啱坐滿.  咦, 土耳其餐廳有位, 咁入去坐低先.

都有一排無嚟, 的Menu印過哂, 唔使問, 一定係加咗價.

哈哈, 就算唔係神算子都估中啦.

今日只得我同麻煩鬼, 佢唔食牛, 如果我地share食, 可以選擇雞同羊.   以前成日都係叫羊肉薄餅同雞捲.  雖然都係雞同羊, 今日試吓不同口味.

要咗呢款燒雞沙律

再叫一客羊肉卡巴卷

野食未到, 飲品先嚟, 凍熱檸檬菜, 土耳其茶, 都係麻麻.

燒雞沙律, HK$65.   入面有三款菜, 生菜, 紅椰菜同紅蘿蔔絲, 仲有兩塊蕃茄.  我覺得都ok嘅, 麻煩鬼有的微言, 話沙律菜, 菜的款式太少.

羊肉卡巴捲, HK$72, 只有6條薯條拌碟. 

羊肉串燒嘅肉做餡料, 味道ok.  但我個人認為雞捲好味的.

埋單唔使加一, HK$137.    麻煩鬼又有微言, 成七十文一個人, 但食唔飽.   咁又係喎, 今日食咗半碟沙律, 半件雞捲真係唔夠飽喎.

好彩我今早有件香蕉蛋糕未食, 一陣要嚟做甜品, 一定夠飽啦.