二人海鮮餐@海鮮站

2012年9月25日下午3:03公開累積瀏覽 574 1

September 21, 2012, Friday Night

昨天食完晏回公司時天雨路滑, 跪咗落地, 今日膝蓋就無事了, 但chok親條腰(昨天都唔覺有咩野), 但今早一起身右邊腰就覺得扯著扯著, 唉吔....唔好整親條腰阿麻...

還好, 返到公司大部份時間都係坐喺道, 又唔覺條腰有咩野喎.

二公子今晚約咗朋友同佢預祝生日, 咁型爸話我地都出去撐檯腳啦.....好野, 今晚唔使煮...(其實佢地都無一定要我煮, 係我自己要煮之麻)

我地講咗好耐話晚上要嚟海鮮站食, 今日卒之有機會.   如果得兩三個人, 又想食海鮮, 咁呢道就啱啦, 因為樣樣細細碟, 可以叫多幾款嚟食呀!  

我地好早到, 不過佢地已經好多booking, 要我地七點半交檯.... 無問題.  呢道地方細, 得幾張檯,  食完就走啦, 唔會阻著人地做生意.

 

今日先留意到到, 原來谷得超嚟過呢道食, 仲响報紙介紹過添.

晚餐有蒜蓉包送喎, 每人一塊細細塊.

海鮮嚟啦...

蒜蓉粉絲蒸扇貝, 一碟三隻....美味!


黃金海中蝦, 咦! 平時的蝦炸得脆的喎, 今日無咁脆嘅.  不過味道都仲係幾好.

蒜蓉炒芥蘭


椒剁醬蒸東星班頭腩.  的椒剁醬麻麻, 但係的東星班頭腩ok, 型爸即刻叫碗白飯

我地再後加多一客蒜蓉粉絲蒸象拔蚌, 又係三隻一碟...美味!

呢道的檯仔細細, 叫多幾樣張檯都放唔落呀, 我地要即刻食噹的蒜蓉包, 蒸扇貝先緊熙放得落呢幾碟.

嘻嘻, 的野嚟得好快, 食完好滿足啦!  埋單HK$390, 我地覺得好抵食.  如果去鯉魚門, 西貢或流浮山, 油料錢都唔得呀! 唔使七點半就還番張檯比佢.

不過今日好唔環保呀! 食完飯我要同型爸講拜拜, 因為我地要各自揸車回家(咁耐以嚟都未試過),.

返到屋企(型爸已經返到去啦, 佢開車快我咁多), Loki又嚟熱烈歡迎.  即刻烚雞肉比佢食啦.

明天唔使返工, 今晚好輕鬆呀!  可以咩都唔做坐喺道睇電視, 仲可以整番碗即食燕窩做飯後甜品添.....正呀!