五號屋的部落: 遊輪假期

2020年3月10日星期二

遊輪假期 - 忙碌的第一天

現在寫篇遊輪假期, 唔係想抽水, 呢一篇想寫咗好耐, 但去完旅行, 跟著就係公司最忙的一月份, 跟著又忙過年, 點知疫症又殺到嚟. 到唔使返工就無心情. 人就係咁衰架啦, 要返工又忙, 家居工作又唔開心.....最後拖吓拖吓, 咪拖到而家囉.

不過今次郵輪假期又真係要寫喎, 因為真的好值得紀念, 一定要紀錄一下.

點解今次聖誕遊輪之旅咁值得紀念, 因為我們六兄弟姊妹, 第一次一齊去旅行. 係由自出娘胎都未試過. 兒時家貧, 那有機會去旅行, 到長大了各兄弟姊妹又要各為家庭奮鬥, 跟著兩位哥哥及一位姊姊移民海外, 連相聚的時間也不多. 兄弟姊妹雖不常見面, 但感情要好.

2018年底, 姊夫提議去一次遊輪假期, 首先就搵我同型爸, 跟著再搵五哥, 搵下搵下, 竟然個個都話得, 結果就安排了2019 年聖誕郵輪之旅. 最特別之處是姊夫在加拿大幫我們報名(因為價錢比在香港報名平好多), 而出發地點在香港郵輪碼頭.

年多前嘅安排, 當時邊個會知香港攪成咁.

當哥哥姊姊們回到香港, 先同媽媽慶祝生日, 亦都可以講這十多年來, 齊哂咁多個兄弟姊妹同佢慶祝生日. 平時媽媽因腦退化關係, 好多野都唔記得, 但同佢慶祝生日那天, 佢好醒晨, 同佢講野, 好有反應呀!

好啦好啦...講咗咁耐, 講郵輪假期未呀? 唔.... 好, 先嚟問答遊戲....

幾時上郵輪呀? 12月22日出發
去幾天呀? 8天, 12月29日早上回到香港
隻船叫咩名呀? 海洋光譜號 (Spectrum of the Sea)
隻船可載幾多人呀? 可載幾多人就唔知, 但成隻船連工作人員有五千幾人
隻船去邊呀? 由香港出發去沖繩, 再去菲律賓停兩個港口
第一次坐郵輪呀? 係呀, 咁大隻嘅船就第一次, 以前淨係坐過雙魚星號咋
隻船有幾大呀? 16萬噸, 16層樓咁高
船上有咩設施呀? 等等, 遲少少話你知
好唔好玩呀? er..........
會唔會好想再去呢? er..........

12月22日, 星期日
--------------------------------
今次真係大陣象, 我地一行16人出發. 我地六兄弟姊妹已經12個人, 加埋姨甥一家四口, 共16人.

我同型爸第一次坐呢的咁大嘅郵輪, 好多野都唔識, 但我有幾位哥哥姊姊都有多次坐郵輪的經驗. 由其是五哥五嫂, 因為常出外跑馬拉松, 上過好多次郵輪. 今次多得佢兩位, 比咗好多有用的資料比我地. 由其是晚膳用餐預訂, 如果唔係佢兩位教路, 真係唔識要訂5:30 咁早食晚飯.

其實正式開船時間係下午四點半, 我地收到通知中午12:30可以上船. 但姊夫及五哥都話最好早的去, 所以我地早上十點半就已經响郵輪碼頭集合.... 去到真係賓墟咁嘅場面, 入郵輪碼頭的士排隊哂長龍, 塞車呀!

去到碼頭先放低的行李比工作人員, 跟著排隊....係超多人, 填緊form時又通知我地預備一張護照影印本唔夠, 因我們要停日本及菲律賓, 每人要兩入易印本. 結果又要排隊影印 (工作人員安排了兩部影印機免費影印), 但咁多人真係嘥好多時間.

最後過埋海關, 用咗個幾兩個鐘.

上到船的房間未得,咁我地就先去15樓餐廳食午飯.....OMG.....因只開了一間餐廳(自助餐) 超多人, 根本搵唔到一張檯可以坐十個八個人, 只有分開搵位, 兩個四個四個. 姊夫同姨甥遅咗嚟, 到佢地上船, 已經安排佢地去三樓另一間餐廳....可以舒舒服服坐响道食.

食完午飯, 我地去睇吓房間安排好未.... 原來已經安排好, 咁就可以放低的手提行李.. 至於大件的行李就要晏的啦. 房間唔係好大, 但尚算ok.

跟著大家相約先上頂層甲板, 再一層層行落嚟睇吓隻船又咩野設施.

下午四點半就要參加一次災難疏散演集(每個乘客必須參加)....初時都好難想像咁多人點做演集, 哈哈, 原來又得喎.

演集完畢, 我地去餐廳食飯. 姊夫一早預訂了五點半食晚飯. 我初時都覺得奇怪, 點解咁早, 但跟著就知啦, 落完單上菜都差不多六點幾, 食完大約七點, 咁就夾啱時間去睇show. 如果無預定, 到我地食完走時, 的人就開始排隊等位食晚飯.