2014年4月30日 星期三

釀青梅酒 - 2014

April 19, 2014, Saturday, Easter Holiday

 食完火雞胸潛艇三文治, 又係時候要開工啦.

去年釀的梅酒收成了, 又係時候再釀梅酒啦.  

星期四晚去一田超市, 有一個位置專賣日本酒, 我問佢地要的度數高的, 佢介紹我呢款壹岐.

呢款壹岐20度, 嗰位小姐話仲有25度(好似仲有30度), 問我要邊款, 當其時我未買青梅, 去年的酒15度唔夠香, 咁今年買20度試吓啦.   (買枝酒時都未知幾時買青梅, 要放假去街市先可以賣)

星期五去完揀工人, 跟著去大埔街市見到的青梅, 真係唔抵得, 本來HK$20 三磅, 佢減到HK$18 三磅.   去年買了9磅, 今年買夠咗12磅.一年浸一次, 唔介意買多的. (不過最緊要有空瓶及地方存放)

試了用九江雙蒸浸的梅酒十分香, 今年再買九江雙蒸, 點知2.59 L瓶裝竟然全部賣哂(唔係咁多人浸梅酒呀?), 結果我要買最大瓶5.18 L, 好彩有型爸同二公子幫忙, 十二磅梅加5.18L酒呀, 我真係攞唔到呀!

今早先將青梅洗淨瀝乾,  到下午就可以開始動手整啦.  昨天將其中一瓶成熟了的梅酒轉瓶入雪櫃, 騰空了一個2.59L的大瓶, 今日洗淨入焗爐烘乾, 吹涼後馬上可以用.

首先挑去梅蒂, 再在每個梅用牙籤刺幾個孔.  今年的青梅比去年的細小小, 但好靚, 每一個都好實淨, 一個爛都沒有.   不過顧著做唔記得影相呀!

將刺了孔的青梅先入瓶, 加入單晶白冰糖, 今次用白冰糖, 幾個月後, 可以加蜜糖, 到時就係蜂蜜梅酒啦.

最後加入酒就可以啦.

盒壹岐有1.8 L, 加埋梅及糖, 一個2.59L唔夠裝, 我要分兩瓶, 一瓶多的一瓶少的


份量標籤好啦, 我今年將青梅的比例提高, 而糖的份量亦加了少許, 希望浸出來的梅味更濃更香.

壹岐燒酌1.8L 20度梅酒, 攪掂啦.

哈哈, 買咗12磅梅點會得咁少...我仲買咗5.18 L九江雙蒸, 黑糖味都未浸呀!

今次只買了一包太古原蔗黑糖

 好彩上次飲完的阿拉老酒1.5L裝的空瓶無掉咋, 現在大派用場呀!
 
1.5L 容量空瓶, 只可裝800ml 酒, 加500g 青梅, 245g 糖已經1.545, 啱啱好呀!   呢三瓶都加了黑糖


剩餘嘅2600ml九江雙蒸, 加了1500g 青梅, 800g 單晶黃冰糖, label 好就攪掂啦.  呢瓶將會係原味.

九江雙蒸釀製有四大瓶, 再加埋壹岐燒酌釀的, 共六大瓶.  明年將會大豐收呀!

夠未呢?


整咗咁多瓶, 仲有大約1100g青梅剩, 仲可以浸的喎.   心思思想買多一盒壹岐25度, 咁就好理想啦.


2014年4月29日 星期二

火雞胸沙律菜潛艇三文治

April 19, 2014, Saturday

昨晚復活節聚餐, 又有少許後遺物, 我又將佢變身.

 
Mrs Kua昨天買了兩條法包, 只係食了半條.  我幫手要了半條, 今日焗脆佢要嚟做潛艇三文治呀!

在一田買的火雞胸肉

昨天剩了一小包沙律菜

再加的菠龍多芝士

將火雞胸肉及沙律菜芝士加入.   食時可加芥末醬

仲有的沙律菜做side dish.   呢份潛艇三文治攪掂啦.

我同型爸每人一份...正呀!

2014年4月28日 星期一

復活節聚餐

April 18, 2014, Easter Friday

牛肝菌飯煲好, 我馬上連人帶煲去八號屋開party.   其實一個小時前已經開始Happy hour, 我已先做好什菜沙律, 飲咗食咗一個小時, 大約七點先返去煲飯, 煲好攞過嚟先慢慢焗 .


又係一大埋小食, 今日有主題架...


主人家訂咗隻48個月黑毛豬火腿,  慢慢片出嚟, 配蜜瓜食呀...其實食吓飲吓, 未到晚餐大家都已經飽飽地.

陶爸帶來的日本whisky官城峽

 
 主人家開定兩瓶酒, 放落decanter air 緊.  

 
 呢兩瓶唔係700ml, 每瓶都係1500ml, 即係話呢兩瓶等於平時四瓶酒有多.    開咗紅酒, 我都唔使攞梅酒過嚟啦.   今日真犀利, 呢兩枝全部飲哂, 即係飲咗4枝幾啦.

睇吓今日食的咩:

陶媽整了送酒小食醉鴨舌

醉雞

  晚餐開始, 先來五號屋的什菜沙律, 我加了煙三文魚及feta cheese

Mrs Kua整嘅香草蕃茄蓉配焗法包

林老闆整了紅酒燴牛尾

黑松露汁意粉, 的汁好香呀!

 
 五號屋呢煲飯本來都好香, 但被黑松露的味道搶哂呢!

主人家焗的牛柳條到了


焗得啱啱好呀!

主人家還焗了椰撻.   佢話太耐無做, 的模生咗锈, 做得唔靚.  但我地覺得味道唔錯, 好快咁幫佢食哂.    諗吓, 我都好耐無整藍莓椰撻, 遲的要整的嚟食吓先.

我地今次五家共十個人, 啱啱好坐哂一張檯.  主人家唔想太多人, 佢話人太多坐都坐唔落, 食都食得唔舒服.

今日好開心, 唔覺唔覺, 傾到十二點, 大家正在研究, 有無機會一齊去旅行呀!


2014年4月27日 星期日

紫洋蔥煙肉牛肝菌焗飯

April 18, 2014, Easter Friday

同二公子型爸食完午飯,去埋Ikea, 買唔到想要嘅野,要快的番屋企,因為今晚有聚會。

今晚以西式為主,除咗整沙律菜之外,我想整多一個牛肝菌焗飯。

出去次前已經將牛肝菌洗淨,用一杯水浸軟

我唔止浸一份,係兩份,因為要煮兩煲。

今晚嘅聚餐,都以成人為主,不招待小朋友。 雖然二公子已經係成人,但佢年輕人同我地邊有咁多野傾,我另外煮一煲比佢食啦。

今次用咗兩個小煲,一個係Benndes 20cm, 一個係Staub 18cm

材料:(每煲計)
紫洋蔥 半個切碎(個人喜好,  鍾意落多的少的都得)
煙用半包, 切片
牛肝菌20g, 洗淨用一杯水浸軟, 浸好後撈起揸乾切碎.  牛肝菌水留起備用.
米兩杯, 先用水浸半小時, 瀝乾
雞湯一杯

無落油, 放的煙肉落去煎, 一煎的油就會出嚟.  兩個煲的做法都一樣

跟著落洋蔥爆香

跟著落牛肝菌爆吓

最後加米,加入雞湯, 牛肝菌水拌勻.    當其時好忙, 真係無手影相

煮滾後加蓋用中小火煮10分鐘, 熄火焗15-20分鐘.

今次用兩個小煲去煮, 每煲兩杯米, 米量同水量都比較容易控制, 上次用大煲煮四杯米, 要煮好耐時間, 煮得耐飯焦又燶, 所以今次分兩煲煮易攪的.

全程無加任何調味, 因為加了煙用, 我怕鹹, 再加上用了一杯雞湯.  食時唔夠鹹可以加豉油.

煮好之後, 我都唔使等, 攞起個Staub就拎去八號屋, 咁多野食, 大家唔會一開始食飯, 慢慢焗都得啦.

不過去到聚餐, 顧著食同傾, 都唔記得焗好開蓋影番一張

到我記得影時已經係咁樣.

的飯ok呀, 佢地話好香, 亦都唔會過腍...哈哈, 睇落有的似荷葉飯呀!兩杯米十個人都夠食, 因為唔係淨食飯麻.  再加上二公子嗰煲佢點食得哂, 佢想食幾多, 先攞起, 其餘嗰的拎埋過嚟.  結果都有的剩....個個都好飽呀!